ZALEN March 31, 2026 : Mizoram Press Owners’ Association chuan Mizoram Sawrkar nen tang duna Mizoram Text Book chhutna tur Printing Press, Phunchawng Mel -10 hmuna a din chu kumin (2026) hian hlawhtling tanin, a vawikhatna atan Mizoram chhungah Zirlaibu Colour-a chhut a nih avangin lawmthu an sawi.

Mizoram Press Owners’ Association chuan, "Kumin hian Mizoram Sawrkar in zirlaibu engemaw zat min chhut tir tan a, he Press a lo hlawhtling theihna atana a bul atanga Mizoram sawrkar aiawha theihtawp chhuaha hma lakpuitu Planning Secretary leh Science & Technology Department te chungah kan lawm a, Kumin bikah mel lung pawimawh tak siam a, a vawikhatna atana Zirlaibu Mizoram chhunga chhut a nih theihnana thahnemngai taka hma latu Mizoram sawrkar Minister Dr. Vanlalthlana leh B. Lalchhanzova te bakah Secretary, Printing & Stationery Department leh Staff te chungah kan lawm a. An zarah harsatna lian tham awm lovin tluang taka, a hun takah zirlaibu kan chhu zo thei hi a lawmawm," an ti.

Kum lo kal zel turah pawh Mizoram Text Book chhut nana vai rama sum tam tak liam thla zel lova, state chhunga sum a luh a, mi engemaw zatin he Press hi eizawnna atana an hman theih zelna tur a hma lakpui zel turin Mizoram Press Owners’ Association te chuan Mizoram Sawrkar an beisei tih thuchhuah an siamah an tarlang bawk.