Aizawl; Mizoram sawrkarin December 1, 2022 atangin Aizawl khawpui leh district khawpuiah eirawngbawlna gas mamawhte an in ngeia pek (home delivery) nise tia thutlukna a lo siam tawh chu a taka tih hlawhtlin a la ni lo a. Aizawl khawpui local council 84-ah veng 20 tling lo chauhin an la kalpui thei a, home delivery a hlawhtlin loh chhan ber hi mipui lam atanga gas book an awm loh vang nia thudawn a ni.

ZALEN-in Food, Civil Supplies & Consumer Affairs thawktute hnen atanga thu a dawn danin gas home delivery hi a taka kalpui chu department lamin duh viau mah se mipui lamah awareness a that tawk loh avang leh gas book an awm miau loh avang te, veng thenkhatah book awm ve bawk mah se a tlem tham em avangin harsatna a la awm tih an sawi.

FCS&CA thawktute chuan mi tam takin home delivery hi an la man thiam tawk lo nia an hriat thu sawiin, “Kawngpui bul hnai, gas lak awlsamna hmuna awmte hian Rs. 70 chawibelh hi an hreh niin a lang a. Kawng bulhnaia awm kher lote pawhin Rs. 70 chawi belh tur hi na an ti niin a lang bwk a. Aizawl khawpuiah hian gas home delivery hi kalpui vek nise chuan Rs. 70 hi chawi a ngai dawn lo a ni,” an ti bawk.

Food, Civil Supplies & Consumer Affairs thawkte chuan veng thenkhatah chuan gas book hi awm bawk mah se a tlem tham thin avangin gas agent-te tan pek a buaithlak tih an sawi bawk a, “Veng thenkhatah mi 4/5-te book an awm thin a; mahse, hetiang va pe nal nal tur chuan agent-te tan pawh a buaithlak a. Chuvangin, point delivery angin gas hi sem a la ni tlangpui a. Mahse, local council tam tak chuan a thatna hi hriain kalpui an tum chho mek a ni,” an ti bawk.

Gas home delivery hi district khawpui dangah pawh veng thlanbik (pilot project) neiin kalpui tan mek a ni a, hetih lai hian Lawngtlaiah erawh eng emaw harsatna a awm avangin kalpui a ni hrih lo thung.

Gas home delivery hi kum 2019 khan pilot project hmangin Aizawl chhunga veng paliah kalpui a ni a, Covid-19 leng vanga hmalakna a khaihlak hnuah nikum June thla vel atang khan Aizawla LPG distributor 12-te chuan an huam chhunga veng pathum theuhah home delivery hi an kalpui leh a; mahse, harsatna hrang hrang avangin agent tlem tê chauhin a takin an tihlawhtling thei a ni.