Aizawl July 30, 2023 :Mizoramah July ni 14 atanga nimin thleng, ni 16 chhung chu Covid-19 hri kai (positive) thar hmuh a ni tawh lo.

Mizorama Covid-19 lam buaipuitu Integrated Disease Surveillance Program (IDSP) chhinchhiah danin Mizorama hrui kai hmuh hnuhnung ber chu July ni 13, 2023 kha niin hemi hnu atang hi chuan hri kai hmuhchhuah thar an awm tawh lo a. July ni 17,2023 khan Covid-19 hri kai chu dam takin a chhuak a, hemi hnu hian hri kai enkawl tun thlengin an awm tawh lo a ni.

ZALEN zawhna chhangin Integrated Disease Surveillance Program a state nodal officer Dr. Pachuau Lalmalsawma chuan,"Hri hian min chenchilh hrih ang a, mahse a dal ve tial tial bawk a. Tunlai hian hri hi a reh deuh niin a lang a, hmuhchhuah a tlem chhan hi test a tlem vang a ni tel bawk a ni," a ti. Dr. Sawma chuan Mizoram mipuiah vaccine la an tam tawh avang leh hri vei an tam tawh bawk vangin tuna hri kai an hmuh te chuan an tuar na vak lo niin a sawi a. Hetih lai hian Covid kher ni lo, natna dang laka him nan hmaituamna (mask) chu hman reng a pawimawh tih sawiin a bikin natna benvawn nei te chu fimkhur lehzual thei se a duh tih ZALEN a hrilh bawk. 

Chhinchhiah danin Covid-19 hian March ni 24, 2020 atangin Mizoram chu tibuai tanin hri kai pakhat hmuh a ni a. Hri kai hi India ram pawn atanga lo haw a niin hun rei tak ZMC ah enkawl anih hnuin dam taka chhuahtir a ni a. Hun engemaw chen hri kai te awmin hri kai awm loh thle te Mizoram chuan a nei bawk a. Hun engemaw chen hri kai hmuh a nih loh hnuah February ni 27, 2023 khan kum 2023 chhunga a hmasa ber atan hri kai 1 hmuhchhuah a ni a. Chumi hnu ah March ni 16 - 30 chhung an awm loh leh hnu-ah March 31 atanga July ni 16 thleng hri kai enkawl lai an awm chho ta char char a, chumi hnu ah ni 18, July, 2023 atangin hri kai enkawl an awm lo leh tan ta chiah a ni.

Covid-19 vanga thi hi October ni 29, 2022 atanga an awm loh vang vang hnu ah May ni 1, 2023 khan an awm leh a. Kumin bikah chuan May thla hi hri vanga Mizorama thi an tam ber tum niin mi 7 ngawtin an thihpui a. June ni 22,2023 khan mi 1 thi lehnin kum 2023 chhungin mi 8 chu Covid-19 vangin an thi a ni. Covid-19 vang hian mi 734 thi tawhin heng te hi kum 2020-ah 8, 2021-ah 537, 2022-ah 81 leh muin 2023 ah 8 te an ni. Covid-19 vanga Mizorama thi kan neih tam ber chu October 2021 kha niin hemi thla hian mi 122 an thi a ni.