ZALEN July 5, 2026: Election Commission of India (ECI) thupek anga special intensive revision (SIR) of electoral roll chu Mizorama assembly constituency 40-ah thawh zawh niin nimin khan draft roll tar chhuah a ni a, Mizoram pumah voter 8,28,906 an awm a. Polling station thar 52 siam niin pakhat paih a ni a, polling station 1,352 a awm tawh dawn a ni. Nimin chawhnu dar 2:00 khan Mizoram pumah SIR 2026 draft roll pawh tihchhuah nghal a ni. 

Nimin khan I&PR Conference Hall-ah chanchinbumite kawmin Chief Electoral Officer Garima Gupta chuan SIR, 2026 phase thumna kalpui mek chungchang hi a sawi fiah a. CEO chuan SIR chu May 20, 2026 atang khan Mizoramah kalpui tan a ni tih sawiin a tira ECI ruahmanna ang chuan Draft Electoral Roll tar chhuah hi July 5, 2026 tur a ni a; amaherawhchu, Pathianni a nih avangin CEO Office, Mizoram ngenna angin July 4, 2026-ah sawn a ni tih a sawi.

CEO chuan, “May 30, 2026 atang khan enumeration phase kalpui tannin BLO-ten in tin an tlawh a, enumeration form sem, lakkhawm leh digitization an kalpui a. Enumeration phase chhunga form sem chhuah zat hi 8,75,068 niin lakkhawm zat hi 8,28,906 a ni a, form lak let theih loh 46,163 (5.28%) a awm a. Hengte hi boral tawh 21,295 (2.43%), awmna chin hriat loh 8,333 (0.95%), hmun danga pem 13,978 (1.60%), roll-a thun tawh 2,248 (0.26%) leh a dang 309 (0.04%) te an ni,” a ti.

CEO chuan SIR kalpui mekah Mizoram chuan a ti tha tih sawiin, “SIR 2026 third phase kalpui mek zingah Mizoram hi Enumeration form 100% digitization zo hmasa ber niin, June 25, 2026 khan zawh fel a ni a. 22-Tuichang (ST) Assembly Constituency, Khawzawl district huam chhunga part zawng zawngah June 14, 2026 khan digitization zawh fel niin, assembly constituency leh district level-ah Mizorama enumeration form digitization zo fel hmasa ber an ni a. Tun dinhmuna Enumeration Form Digitized hi 8,28,906 a ni a. Heng enumeration form digitized-te hi draft roll-ah pawh an chuang chhunzawm dawn a ni,” a ti bawk.

Draft roll-a awm lote tan electoral roll a inthun luh dil theih a ni tih sawiin CEO chuan, “India khua leh tui dik tak, July 1, 2026-a kum 18 tling tawhte chuan mahni bialtu ERO/AERO/BLO hnenah electoral roll-a inthun luh dilna theh luh chhunzawm zel theih a ni a. Dilna hi https://voters.eci.gov.in leh Voter Helpline App atangin theh luh theih a ni bawk a. Draft Electoral Roll hi EROs, AEROs, BLOs leh DC/DEO office-ah leh CEO website https://ceo.mizoram.gov.in/ ah en theih a ni a, political party-te pek vek an ni ang. 

July 4, 2026-a draft roll tlangzarh a nih atang hian claims and objection period chu July 4, 2026 atanga August 4, 2026 thleng hawn a ni,” tiin, “Tun thlengin SIR 2026 kalpui dan chungchangah harsatna lian tham kan la tawk lo va. Official zawng zawngte inpekna leh khawtlang hruaitute leh vote nei zawng zawngte thawhpuinaah lawmthu kan sawi a, revision hi a hun takah tluang taka zawh theih kan inbeisei a ni,” a ti bawk.