ZALEN March 24, 2026: State Tobacco Control Cell, National Tobacco Control Programme, National Health Mission buatsaihin vawiin khan “Training of Trainers for Mizoram Government Dental Surgeon” chu DHME Auditorium-ah neih a ni. He training hi Sawrkar hnuaia Dental Surgeon thawk mek te tan a buatsaih a ni. He training-a Special Guest, Additional Director Dr. Zonunmawii Pachuau chuan Mizo zinga 58.7% chu vaihlo zuk leh hmum ti an nih thu a sawi.

Dr. Zonunmawii Pachuau chuan, "Global Adult Tobacco Survey (GATS) 2016-17 in a tarlan danin Mizoram chu vaihlo, zuk leh hmuam ti tam lamah India ram pumah kan sang hle a ni," a ti a, 58.7% in vaihlo zuk leh hmuam ti an awm thu a sawi. Hemi piah lamah hian Global Youth Tobacco Survey – 4, kum 2019 a neihin a tarlan danin zirlai kum 13 atanga 15 inkar zingah vaihlo zuk leh hmuam hmang mek hi 58% zet an awm bawk a, nu leh pa ten kan fate vaihlo zuk leh hmuam ti lo tura zirtirna pek tam a pawimawh tak zet a, mi thiamte chuan ruihhlo hman tanna kailawn (Gateway substance) an tih chu vaihlo zuk leh hmuam hi a ni tiin hriselna a khawih chhiat bakah economy thlengin a nghawng thei a ni tihte ngaihtuah a hun tawh hle a ni, a ti bawk.

NTCP State Consultant R. Lalremruata chuan National Tobacco Control Programme hmalakna a tarlang a, Hospital tina Doctor-te hnathawh tur leh an tih tur te leh vaihlo sim thei tur a puih dan tur chungchangte a sawi bawk. State Legal Consultant Vanlalzari kaihhruaiin NTCP in COTPA 2003 te, PECA 2019 (E-Cigarette khuahkhirhna dan) chungchangte zir hona neih a ni bawk.