Asmita Khelo India Youth, Junior leh Senior Women League Zone A-a inlan turin Mizo ritchawi chak hmeichhe pali chuan Thawhtanni hian Mizoram an chhuahsan.

Inelna hi Bhubaneswar, Odisha-ah Nilaini atanga tan tur a ni a, Pathiannia zawh tura ruahman a ni a. Mizoram atang hian Khelo India State Centre of Excellence (KISCE), Sports & Youth Services atangin player pali bakah official pahnih an tel dawn a ni.

Mizoram aiawha rit chawi tura kal zinga pahnih, Zodinsangi leh B.Lalremruati te chu Youth huangah chauh an inlan ang a, Cindy Lalparmawii leh Zosangzuali te erawh huang chi thum - Youth, Junior leh Senior-ah an inlan vek dawn a ni.

Khelo India hnuaiah hian India ram hi zone hrang hrangah then niin Zone A-ah hian state 13 - India khawchhak lama West Bengal, Jharkhand, Bihar, Chhattisgarh, Odisha leh hmarchhak state pasarih an tel a ni.

Mizoram aiawha kalte:

1. Zodinsangi (45 kg), KISCE/Falkawn

2. B.Lalremruati (59 kg), KISCE/Dinthar

3. Cindy Lalparmawii (76 kg), KISCE/Kolasib Saidan

4. Zosangzuali (+87 kg), KISCE/Keitum

Anni bakah hian official pahnih, Malsawma Khiangte, Coach KISCE/Bethlehem leh Malsawmtluangi, Masseuse, KISCE/Republic Vengthlang te an kal bawk.