Aizawl: Nimin khan MZP General Headquarters bultumin ramri chungchanga inrawnkhawmna ‘Consultation Meeting on Mizoram-Assam boundary’ chu MZP Conference hall-ah neih a ni. Inrawnkhawmna a thu sawitu MZP President L. Ramdinliana Renthlei chuan, “Vawiin niah hian Mizote hnam anga kan tanrual a hun a, Political Party anga hamthatna emaw advantage lo lak tumna chi a ni lo a ni,” a ti a. “Tunhma in kan ram roreltu ten kan ramri chungchangah theihtawp chhuahin hma an lo la tawh thin a, tih fuh leh tih fuh loh lai deuhte an nei ang, hun kal tawh kha siam that theih a ni tawh lo a. Vawiin ni atang hian Zofa zawng zawngte i tangrual ang u,” a ti. MZP President chuan Zofate Chawlhbuk an sakna a kal Assam chanchinbu mite kut thlak lova Mizoram chanchinbu mite Assam police-ten kut an thlak chu an dem tih a sawi bawk. Consultation Meeting on Mizoram-Assam Boundary-ah hian party hrang hrang leh NGO te an kal kim vek a, 1875 Bengal Eastern Frontier Regulation-in ramri a sawi bak ramri a awm loh thu te, Bairabi Zophaiah Zofate Chawlhbuk ding ngei se an duh thu te, Assam Police-ten silai nena zirlaite an bei an dem thu te, Firing Order petu Hailakandi DC Adil Khan chu a phutawk hremna pe ngei tura sawrkar an duh thu te, Mizoram chanchinbu mite Assam police-ten na taka kut an thlak an dem thu te, Mizoram-Assam ramri chungchangah All Party leh all NGO angin Memorundum President, Prime Minister leh Union Home Minister te hnenah thehluh ni se, ramri chungchang zirchiangtu tur Expert Committee siam tura Mizoram sawrkar ngen nise an tih bakah ram humhalh turin lungrual taka ke pen ho zel ni se tih resolution an pass a ni.