Aizawl October 15, 2023 : Mizoram Blind Society chuan vawiin October ni 15, 2023 khawvel puma mitdelte tana ni pawimawh tak, mitdelte tiangvar hman tan ni (White-Cane Day) pualin mipuite chibai an buk.

Thuchhuah an siamah Mizoram Blind Society chuan he ni pual hian zoram mipuite leh a bikin lirthei khalhtute zawng zawng mitdel tiang hawl, khawlaia an hmuh chuan tanpui ngai leh an tiang ken hi zah sak tur a ni tih hrethar turin an ngen a. Hemi ni pual hian Mizoram Blind Society chuan kum 2016 atang khan a bika programme te siamin hun an hmang thin tih sawiin kumin White-Cane Day chu Pathianni a nih avangin he ni puala a bika programme hman a remchan lo niin an sawi bawk.

White Cane Day hi kum 1921 khan thlalaka eizawng sap pachal James Biggs chu accident vangin a mit a del a. A mitdel hnu chuan khawlaia a chhuah changin tiang var a hawl thin a. A tiang hawl rawngvar a hnawih chhan chu lirthei khalhtute leh kawtthlera veivak midang ten amah chu khaw hmu lo, mitdel hriatthiam ngai a ni tih awlsam taka an hriat theih nan a ni a.

James Biggs-a tiang hnawih var hi a tangkai ta phian a. America rama mitdel pawl (The National Federation of the Blind) chuan White Cane Day hranpa hial serh hrang turin thuneitute an nawr ta a. Chu ngenna azarah chuan American Congress Joint Session chuan an remtih angin America President LB Johnson chuan kum 1964 atang chuan October ni 15 chu kumtina White Cane Day anga serh turin thupek a chhuah ta a ni.