Aizawl November 26, 2023 ; Mizoram boruak chu a bawlhhlawk chak hle a. Boruak bawlhhlawh leh bawlhhlawh lo tehna, Air Quality Index-ah a san lai berin 216 a thleng a, hei hi fimkhur ngai tak, rei tak hip luha thawk tiharsa thei a ni. ZALEN-in Mizoram Pollution Control Board thawktute hnen atanga thu a dawn danin tun hnaiah Mizoram boruak a bawlhhlawh zualin khua pawh kum kalta aiin a lum zual hle a. MPCB chuan boruak bawlhhlawh dan leh khawchin ngun taka a zirchian thinna atanga a lan danin khawpui boruak a bawlhhlawh nasa chho hle mai a, chu chuan sik leh saah nghawng neiin khua pawh a lum zual hle niin an sawi. MPCB thawktute chuan kumin chhung ringawt pawhin thal laia Mizoram boruak chu a bawlhhlawh chak hle a, boruak bawlhhlawh dan tihlanna, AQI-ah Aizawl khawpui chu January thla khan AQI 65 a ni a, February leh March thlaah 85 kai chhoin April 10 atang phei kha chuan 100 chung lam kaiin 150 bawr velte a ni chho ta a, a san ber lai phei chuan 216 a kai pha hial tawh niin an sawi a. Nikum lam nen khaikhinin AQI hi a sang chho nasa hle tih sawi bawkin nikumah a san ber laiin AQI hi 104 a nih laiin tun kumah chuan 216 a kai niin an sawi. MPCB thawktute chuan, “Tun hnaia Mizoram boruak dinhmun hi AQI zat atanga en chuan Level-3 (moderately polluted category)-ah kan awm mek a, tun hma lam chuan a tlangpuiin ‘good category’ a awm thin kan ni a, eng emaw lai phei chuan khawpui boruak fai ber nihna pawh kan hauh a, tunah erawh chuan a bawlhhlawh chak ta hle a ni,” an ti. Boruak bawlhhlawh chhan chu motor pun chak vang te, bawlhhlawh hal leh lo hal, ram kang thleng vang te niin an sawi. Nikum lam nena khaikhinin khawlum dan pawh a danglam chho nasa hle tih sawi bawkin, "Nikum April thla khan a lum lai berin 27.24 degree C a ni a, kumin April thlaah erawh chuan 34.16 degree C a kai tawh a. Nikum lam nen a san ber lai inthlauhna hi 6.92 degree C lai a ni tawh tihna a ni. Data atanga a landan pawhin boruaka bawlhhlawh a punna AQI a san apiangin khua a lum zual a ni," an ti bawk. Hetih lai hian Mizoram Pollution Control Board Secretary C.Lalduhawma chuan Mizoram boruak chu bawlhhlawh chho deuh mahse mipui ten tan kan lak chuan a la hlauhawm lutuk lo tih sawiin, "Mizoram kan vanneihna chu ruahtui kan dawng tha a, hei hian boruaka bawlhhlawh cham tur kha a tibo a. Thal ah erawh ruah a awm loh avang leh lo hal, lirthei khu leh ramkang vangin AQI ah kan sang thin a ni," a ti. Tunlaia Delhi boruak bawlhhlawh chhan sawiin, "Thlasik ah hian vansanga boruak bawlhhlawh hi a lo chhuk thin a, hei vang hian damloh pawh a awl a. Delhi leh India ram khawpui dang te hi ruahtui an dawng tha lo a, motor, industry leh diwali vanga halpuah hal nasat nen an boaruak hi a bawlhhlawh zual ta a ni," a ti. C.Lalduhawma chuan boruak bawlhhlawh leh bawlhhlawh loh tehna Ambient Air Monitoring Station, tuna Sikulpuikawn a awm mek chu lei belhin district khawpui leh census town remchangah te bun an tum niin ZALEN a hrilh bawk. Delhi ah hian kumina AQI a san lai chuan 500 chunglam te a ni a, sawrkarin school chawlh a puang hial. AQI range Hriselna a nghawng dan 0-50 Harsatna thlen meuh lo 51-100 Mi awmnem deuh tan thawk harsatna a thlen 101-200 Chuap/lung natna nei, naupang leh upa tan thawk harsa 201-300 Rei tak hip luhin thawk a ti harsa 301-400 Rei tak hip luhin thawkna kaihhnawiha natna a thlen >401 Mi hrisel pangngai pawhin an tuar tawh