Aizawl February 23, 2023: MPYCC chuan Mizoram Sawrkar Budget 2023-2024 Mizoram rorelna sanga pharh takah mipui chanvo tur a tlem tual tual a, Sawrkar sum leiba a pung tulh tulh an ti. Ram mipuite tan he Budget hi lawmna tur engmah a awm lo an ti a, nitin khawsakna a harsa chho dawn tiin, pawi an tih thu thuchhuah an siamah an tarlang. 

Mizoram budget tharah zaa 78 (77.89%) hi sawrkar hnathawk hlawh leh inrelbawlna atana hman tur a ni a, mipuite tan zaa 22 (22.09%) chauh a ni MPCC chuan an ti. "Hetiang a nih chuan sawrkar hnathawk te'n a hun taka hlawh an lak loh chuan engkim mai a buai fo dawn tihna a ni a. Cheng vbch 640.01 teh meuha indaihlo sa tura pharh a ni leh, Budget tharah cheng vbc 272.33 puk belh chung pawha kum tawpah cheng vbch 628.51 zeta indaihlohna awm sa tur hi a vanduaithlak kan ti takzet a ni," an ti.

MPYCC chuan, "Tun dinhmunah Reserve Bank of India (RBI) tarlan danin Mizoram hi India ram state zinga leiba nei hnem ber kan ni a,  2019= 34.9%, 2020= 42.6%, 2021= 56.7%, 2022 (RE) = 55.7%, 2023 (BE) = 53.1%. Hetiang a nih mek laia Chief Minister Pu Zoramthanga, Finance Minister ni bawkin Assembly Session-ah leiba a engto vak loh thu a la sawi mai te kha ram siamthat tumna tak tak a neih lohzia lanna chiang tak niin kan hria a. Sum enkawl thiam loh avanga mipuiten harsatna kan tawh thinah Covid 19 chhuanlama an hmang thin pawh hi sim tawh se, mipuite bum tawh lo turin Mizoram Sawrkar hotute hi kan chah nghal a ni," a ti.