Aizawl February 13, 2023: Kum 2023-2024 chhung a hman tur Mizoram Budget Chief Minister leh Finance Minister Zoramthanga’n vawiin February ni 13,2023 a a pharh ta chu Mizo National Youth Front (MNYF) Headquarters chuan lawmawm an tih thu leh Finance Minister Zoramthanga inpekna leh thawhrimna an chhuan thu thuchhuah an siamah an tarlang.

Kum 2023-2024 budget, cheng vaibelchhe 12,112.97 pharh tak chhungah hian Mizoram mipui tana hmasawnna tur thiltam tak tarlan a ni MNYF chuan an ti a. SEDP hnuaia hnathawhna tur cheng Vaibelchhe 595 dah te, mipuite chhawr mek Health Care Scheme ah cheng vaibelchhe 60.00 dah te, Samagra Shiksa hnuaia thawktu mi 5537 zet te hlawh leh hamthatna dawn tihsanna tura cheng vaibelchhe 52.98 dahbelh te, Mizoram zalenna tur atana beitu MNF Returnees te hamthatna tura cheng Vaibelchhe 5.00 dah a ni te hi lawmawm an tih thu an tarlang.

MNF Thalai chuan Mizo thalai leh zirlaite All India Service leh Central service an luh tam theihna tura puihna tur cheng nuai 50 zet dah a ni te, College zirlaite’n an fee pek atanga an College tihhmasawnna tura cheng Nuai 120 dah thar tak te, District thar leh RD Block hawnthar enkawlna tura vaibelchhe 5.96 dah a ni te, Mizorama tlawmngai pawl hrang hrangte’n ram leh khawtlang rawngbawlhna hna an thawhna a tanpuina tur cheng nuai 50 dah te bakah Lunglei Municipal Council thar enkawlna tur cheng nuai 128.00 dah te a tel a ni, an ti bawk. 

MNYF chuan Hun hmasa lamah kha chuan Mizoram Budget hi kumtir lamah, hma taka pharh theih a ni ngai lo, an ti a.  "Pu Zoramthanga kaihhruai MNF sawrkar a din tirh 2019-2020 khan March thlaah pharh niin, hrilen vanglai tak 2021-2022 chhung khan March thlaah pharh a ni bawk a. Heng kum tih lohah hi chuan MNF sawrkar chuan February thla ah sawrkar sum hman tur ruahmanna Assembly Session-ah a  pharh thei zel mai hi lawmawm kan ti a. Sum leh pai inrelbawlnaah MNF sawrkar hian felfai takin sorkar a kalpui a ni tih a lang chiang hle," an ti

Kum 2023-2024 chhunga hman tur Zoramthanga kaihhruai sawrkarin Mizoram Budget cheng vaibelchhe 12,112.97 a pharh chu Mizoram mipui tan budget tha a tling a ni, an ti bawk.