Aizawl; Kum 2010-11 atanga kum liam ta, 2021-22 chhung a Mizoram buh thar zat chu metric ton (MT) 47,201 leh MT 62,089 inkarah a awm a, buh thar zat hi a pung mawh hle a. Hetihlai hian Mizoramah leilet (WRC) siam theihna hmun hectare (ha) 74,644 awmin, leileta siam theih tura ngaih la siam loh zau zawng chu ha 57,927 a tling.

ZALEN-in RTI zawhna a siam, Agriculture Department SPIO-in a chhan danin tun hnai kum 12 (2010-11 atanga 2021-22) chhunga Mizoramin buh a thar (tlangram leh leilet) tam ber kum chu 2015-16 niin, MT 62,089 thar a ni a, a tlem ber chu 2010-11 niin, MT 47,201 a ni.

Tun dinhmunah Mizorama leilet awm zau zawng chu ha 16,717 niin, MIRSAC report-a a lan danin Mizoramah (0-25% slope), leilet siam theihna hmun ha 74,644 a awm a, hetihlai hian leileta siam theih tura ngaih, la siam loh zau zawng chu ha 57,927 a la tling.

SPIO tar lan danin, department-in a hriat theih chinah tlangram lo neih (kum tina lo vah)-in kiam lam a pan a, hetih lai hian Mizoram buh thar a pun theihna turin agriculture department-in ruahmanna/hmalakna hrang hrang a kalpui a. Chungte chu, buh chinna tur atana ram zawl awmte leilet atan a laih/siam te, buh thar hlawk dan method hrang hrang huan/lo neitute demonstration hmanga zirtir te, buh chin uar zel a lo nih theihna tura khawl mamawh power tiller, tractor etc. huan/lo neitute hnen a subsidy-a pek te, buh ei chhetu rannung leh natna laka a him theih nan huan/lo neitute zirtir leh damdawi (PP chemical) pek te, buh thar hlawk chi HYV leh Hybrid-te uar zawka chin a nih theihna tura hmalak te bakah, leileta tui lakna ‘water channel’ tha zawk a siam te a ni.
    
BUH THAR DAN
Kum          Thar zat (MT)
2010-11    47,201
2011-12    52,895
2012-13    57,700
2013-14    58,994
2014-15    60,679
2015-16    62,089
2016-17    61,516
2017-18    59,605.6
2018-19    60,010
2019-20    60,239
2020-21    61,425
2021-22    60,881