ZALEN May 21, 2026: Election Commission of India duhdan angin Mizoram Chief Electoral Officer (CEO) Garima Gupta chuan vawiin khan Special Intensive Revision of Electoral Rolls 2026 kalphung tur SIR 2026 kaihhnawih thil pawimawh hrang hrang a tarlang. Hemi kawnga Mizoram hmalak dan chu fakawm a tih thu a sawi

CEO chuan SIR 2026 thiltum ber chu vote nei thei zawng zawngte Electoral Roll-a thun vek an nih theihna tur leh vote nei thei lote E-Roll a an luh lohna tura hmalak a ni, a ti. Electoral Roll thianghlim leh felfai siam chu an hmalakna pawimawh ber a ni a, chu chu democracy innghahna bulpui a nih thu a sawi bawk.

SIR 2026 atan hian Mizoram District zawng zawngah inbuatsaihna nasa taka kalpui mek a nih thu a sawi a. Enumeration form-te chu district zawng zawngah download fel tawh niin, Phase-III SIR kalpui mektu state 16 zingah Mizoram chu enumeration form download zo thei hmasa ber a ni, a ti. Form print hna pawh tan tawh niin, tunkar tawp ngeia zawh fel beisei a ni, a ti bawk.

CEO chuan electoral roll hmasaa hming chuang tawhte pawh tiamin, vote nei tawh zawng zawngten enumeration form thar submit leh vek tur a nih thu a sawi a. Block Level Officer (BLO)-te chuan May 30 atanga June 28, 2026 thleng in tin an tlawh dawn a, an area chhunga voter-te hnenah enumeration form an sem dawn, a ti a. Voter-te chuan form an fill up zawhah BLO-te hnenah an pe ang a, online-ah pawh upload theih a ni bawk. BLO-ten Enumeration Form an dawnte chu BLO App hmangin an upload ang a, hard copy-te chu official record atan CEO office chuan a vawng tha ang.

CEO chuan Mizorama Intensive Revision neih hnuhnung ber 2005 electoral roll-ah voter te chuan an hming a chuan leh chuan loh an en dik anga; hetih hunlaia vote la nei hman lo te chuan, an nu leh pa emaw, an thlahtute hming a chuang em, tih an en anga; 2005 Roll-a anmahni emaw an thlahtute hming chuang lo te chuan Form-6 hmangin E-Roll a luh dilna an thehluh a ngai dawn a ni, a ti bawk.

He SIR hian kum tam tak vote lo nei tawhte, Mizoram mi leh India khua leh tui dik takte electoral roll-a chuan tir vek chu a tum ber a ni a.Voter lut thar turte pawh ngaih pawimawh an ni a. July 1, 2026 a kum 18 tling chinte chu voter thar atan telh theih an ni ang. Draft electoral roll chu July 5-ah tihchhuah tur a ni a. Chuta hming lang lo, vote nei thei ngei si, inthunlut duh te; vote nei thei lo tur, an hming draft roll a lo langte paih tura rawtna - claim leh objection thehluhna atan thla hnih hun pek a ni ang. Draft roll chu mipui hmuh theih turin tarchhuah a ni dawn a, online-a en duh tan CEO website-ah pawh en theih a ni ang. Claim leh objection-te chu District Election Officer (DEO)-ten an ngaihtuah ang a, chuta lungawi lo tan CEO hnenah thlen theih a ni dawn a ni.