Aizawl; HIV/AIDS vei enkawlna Antiretroviral (ARV) damdawi chu Mizoram chauh ni lo, Hmarchhak state leh state dangah pawh a khaihlak a, pawisaa India pui thin ram te chuan an puihna an tih tawp avangin India chuan 'funding' lamah harsatna a tawk niin 'United Nations Office on Drugs and Crime' (UNODC) hotu chuan Zalen a hrilh. India state 35-a State Aids Control Society (SACS) theuh hnenah NACO chuan sum a pe thin a. Heng sumte hi UN agencies, Bill & Melinda Gates foundation, Global BFT leh ram dang atanga dawn a ni a, tunah hian tih tawp a nih avangin ARV damdawi, a thlawna condom sem leh testkit te chu India state te chuan an indaih lo hle. “PM thar Modi-a chuan India chu ram thang ve mek zingah a awm tir duh lo a, developed country zinga in chhal a duh a, UN leh ram dang atanga puihna a hmuh thinte chu a hnar a, NACO in AIDS dona tura sum a hmuh thinte pawh a tawp ve nghal a. Modi a chet dan hi 'international game' lian tak a ni" tiin Kunal Kishore, Coordinator, South Asia, UNODC chuan ZALEN a hrilh. “Kalphung pang ngaiah chuan ram dang sum tlingkhawm te chu health ministry chuan a do let thin a, a mal tan tak avangin sum harsatna a thlen a, SACS dawn tur sum chu tihhniam a ni a. Hmarchhak state chauh ni lo ram pum huapinHIV positve te damdawi mamawh indaihlohna a thleng vek a ni,” tiin UN palai chuan ZALEN a hrilh. Harsatna thlentu pakhat leh chu Central Sawrkar chuan Centrally Sponsored Scheme (CSS) te chu society ni lovin state sum bawmah a chhung tawh a, society te chuan state sawrkar atangin an dawng ve thung tawh a ni. Kalphung thar bel tur chuan hun a ngai rei dawn a, hemi hun chhung atan hian remruatna lailawk a awm lo a, kalphung a muan phah a. Hetiang tho hian AIDS pawisa pawh sawngbawl a ni tawh. NACO -ah AIDS dona tur sum eiruk a hluar tih hriat chhuah a ni a, hemi hnu mai hian Health Department-ah NACO chu chhunluh a ni. Modi-a sawrkar in ‘hnathawh tam theih nana sawrkar tih tet' a kalpui nghawng chhuah niin UN palai chuan a ngai bawk a ni. Health Department in NACO a lak hian sawrkar chuan eirukna a ven theih a beisei a ni. **Delhi Network of Positive People chuan ARV tlachhama awm an duh loh thu sawrkarah lehkha in an thehlut. **NACO kaltlang hian HIV darh zel tur chu 57% ah India chuan a ti hniam a, UN?pawhin 30% chu tha thawkhatah a ngai. Ram 15 in India in AIDS a do dan an zirchiang. **2017 ah national Aids control programme chu National Health Mission ah rin luh tum a ni . Inhnialna a tam hle. ****India ah HIV +tive Nuai 25 chuang an awm. ****India in AIDS a do dan hi ram 15 in an zir tawh. ****NACO hian HIV vei 768, 000 hnenah a thlawnin ARV a pe. ****Nu leh nau inkai chhawn na lam hlamchhiah a ni. ****Health Dept.-a NACO dah hian buaina a thlen.