Aizawl March 27, 2023 : MNF Adviser Dr.R.Lalthangliana chuan vawiin khan LMC campaign vawrhtawp beihpui thlakin ward hrang hrang a tlawh a, MNF campaigner te chu party dang te bei lo turin a chah. Mizoram chhe lailet der anga sawi chu kalphung thar zuartute kal dan a ni, a ti. 

Dr.R.Lalthangliana chuan LMC campaign naah hian mimal ang leh a party ang pawhin na deuh deuh leh dawt phuahchawp hmang te, tawngkam mawilo taka MNF campaigner-ten party dangte bei ve chiam chiam lo turin a chah. 'Pathian leh kan ram tan' titu kan nih angin, Lunglei mipui tan MNF sawrkar hmasain LMC-a dinah hian state sawrkar nen, rorellai MLA-te leh LMC member tharte nen inlaichinna tha tak neia Lunglei khawpui nasa taka tihhmasawn dan tur chu mipui hnenah hrilhfiah zawk thin turin a chah.

MNF Adviser chuan, "Sawrkarna la chelh ve ngai lo, sawrkar kalphung leh ram hruai dan pawh la tem chhin ve ngai lo ten Congress, PC leh MNF sawrkar kal tawh leh sawrkar lai beih ringawt, an thil tih that lai sawi duh si lo, a chhe lai ringawt sawi reng mai. Mizoram hi chhe lai let der anga sawi a, a beidawng zawng hlira mipuiah zirtirna pea kalphung thar zuartute kal dan hi a tha lo," a ti. Budget la khawih ngai lo ten LMC lo piang tura thil lian tham  kalpui ngaihna an hriat loh tur thu sawiin, MNF LMC-a pian chuan model LMC an din dawn tih a sawi bawk.

Dr. R. Lalthangliana chuan, "Lunglei mipuiin kum 20 tel Tlumtea thlira an thlir, MZU Southern Campus hi kum 2020 January-ah sanction kan hmu. CM pawhin theihtawp a chhuah bawk. A hmun hma zawng zawng tihfel a ni a. DPR pawh engkim kan siam diam a, a thawktu tur lak leh building sak turte pawh Central-in covid nghawng avangin min pe thei rih lo a, hmannia Delhi ka zu kal khan ka nawr nawn leh a, a la fel thuai ang," a ti. 

Lunglei by-pass road atan cheng vaibelchhe tam tak ruahmanna an siam tawh thu leh NHIDCL hnenah tender pek tawh niin MoRTH chuan DPR a chhuah tawh chu a sawi nawn leh a. Tui lama harsatna lian tak awm thin sutkian nan tui in tur thianghlim Lunglei mipuiten an neih theih nan project lian tak an siam tawh thu a sawi bawk.