Aizawl February 14, 2023: Mizo National Youth Front (MNYF) Headquarters hruaitute chu vawiin hian Election office-ah an leng a, Tripura-a khawsa Tuikuk/Bru-te Mizoram Electoral Roll atanga paih an nih tawh dan an zawtfiah a, hmalakna chak zawka kalpui theih dan a awm em tih te an sawipui a ni.

Kum 2020 January ni 16 khan Chief Minister Zoramthanga kaihhruai MNF sawrkar leh tlawmngai pawl hrang hrangte chuan Tripura-a khawsa Tuikuk/Bru-30,000 chuang zet Tripura hmuna awm nghet turin Union Home Minister Amit Shah kaihhruaina hnuaiah New Delhi-ah inremna thuthlung ziah a ni. Hemi tum hian Mizoram Chief Minister bakah khatih laia Tripura State Chief Minister Biplab Kumar Deb leh Bru pawl hrang hrang aiawhte chuan inremna an siam a, November ni 30, 2019 hnu lama Tripura Relief Camp-a Bru la awm mekte chu an duhthlanna in Tripura State-a an chen hlen remtih a ni. 

Hmalakna kal zelah hian Tripura State-a inbengbel tawh, Mizoram electoral roll-a hming la chuang Tuikuk/Bru voter 11,658 chu Election Commission of India (ECI) kaihhruaina hnuaiah Mizoram Electoral roll atanga paih tura hmalak a ni a. Mi 4,339 chu Mizoram Electoral roll atanga paih an ni tawh a. Tripura-a inbengbel tawh Mizoram Electoral roll atanga paih hmabak la awm hi voters 7,319 an ni.

Tripura transit camp 6-a awm Tuikuk/Bru-te hi Union Home Ministry hriatpuina leh remtihna a Mizoram Sawrkar leh Tripura Sawrkar bakah; Bru pawl hrang hrangte remtih tlanna ngeia buaina lo awm tawh chinfel a ni chho chu MNYF Headquarters chuan lawmawm a ti a. Mizoram leh hnam tana hriatreng tur hmasawnna siamsaktu Chief Minister Zoramthanga leh a kaihhruai Mizoram sawrkar chungah lawmthu an sawi.

Mizorama rorelna in sang ber Assembly House-ah Uniform Civil Code duh lohna pass a ni chu MNYF chuan lawmawm an tih thu leh Mizoram leh Mizo mipuite tan MNF chu innghahna tlak a nih zia a lang chhozel ah a ngaih thu an sawi bawk