ZALEN, Oct. 11, 2024: Mizoram Synod hnuaia inkhawmpui lian ber dawttu, Presbytery Inkhawmpui chu Ningani atang khan Mizoram chhung leh pawn hmun hrang hrangah hman mek a ni a, Pathianni zan thleng a awh ang.

A tan niah hian chhun lamah Nomination Committee, Finance Committee leh Sub-Pastoral Committee an thu a, kohhran upa thlan tharte exam buatsaih a ni a, zan inkhawmah Palai Lawmna leh pastor bial report ngaihthlak a ni.

Zirtawpni chawhma leh Inrinni nileng hian Rorel Inkhawm neih a ni ang a zan lamah vantlang Pathian biak inkhawm a awm ang a. Rorel inkhawm hi Presbytery thenkhatah chuan Inrinni chauha hmang an awm thin bawk.

Pathianni chawhmaah Upa Nemngheh Inkhawm awmin Presbytery Moderator-ten an nemnghet ang a, chawhnuah Lalpa Zanriah Sakramen thehin inkhawmpui neih hmasak leh tun inkara kohhran upa thite sunna inkhawm a awm ang a, zanah moderator kalchhuakten valedictory sermon an sawi ang.

Presbytery inkhawmpuiah hian an huam chhung theuhva kohhran thil pawimawh bakah inkhawmpui lian zawk, Synod Inkhawmpuia kal zel tur chite ngaihtuah lawkna a ni.

Synod puipate pawh hmun hrang hrangah inkhawmpui hmanpuiin an chhuak a. Rev. R. Vanlalnghaka, Moderator-in Chhimchhak Presbytery-ah hmanpuiin Aizawl West I-ah Rev. P.B. Mankima, Synod Secretary (Sr.); Aizawl Central-ah Upa Vanlalsawma Siakeng, Synod Secretary (Jr.); Serluiah Rev. P.C. Pachhunga, Finance Officer, Hmarthlangah Rev. H. Laltlanthanga, Statistician; Khawthlangah Rev. C. Zorammawia, Sr. Executive Secretary; Teirei-ah Rev. V.L. Luaia Hranleh, Executive Secretary leh Chhimpheiah Rev. Dr. K. Lallawmzuala, Executive Secretary ten an hmanpui.