ZALEN November 21, 2024 : Government of India, Ministry of Home Affairs chuan Director (Services) hmingin vawiin khan order a ti chhuak a, 1993 AMGUT Cadre Shri Khilli Ram Meena, IAS (AMGUT : 1993) chu central deputation-in Mizoram Chief Secretary atana ruat a nih thu a tarlang.

Khilli Ram Meena, IAS hi tuna a hna thar tur a chelh hma hian Ministry of Minorities Affairs-ah Additional Secretary hna a chelh a, tunah hian a parent cadre-ah a kal dawn ta a ni.

Khilli Ram Meena hi December 4, 1967 khan Rajasthan-ah a piang a, kum 25 a nihin UPSC exam a paltlang a, Indian Administrative Service a zawm. Kum 57 mi ni mekin Mizoram Chief Secretary atana ruat a nih hma hian Ministry of Minorities Affairs-ah Additional Secretary hna chelh a ni.

September 5, 1993 khan IAS hna hi a zawm a, thiamna lamah M.A. (History), Post Graduate in Art a ni. SDO in Arunachal Pradesh, Additional General Manager in DVB, Deputy Secretary in School Education & Literacy, Director in Higher Education leh Principal Secretary Delhi-ah hna te a lo chelh tawh a, Arunachal Pradesh-a Sub Divisional Officer hna a chelh hi a hna chelh hmasakber niin, he hna hi September 1, 1995 - July 1, 1997 chhung khan a chelh a ni.

Mizoram Chief Secretary tur bakah hian Chandan Bhushan Kumar, Additional Secretary and Mission Director of the Jal Jeevan Mission chelh lai, 1995-batch IAS officer niin AGMUT cadre bawk a ni a, ani pawh hi a parent cadre-ah hian a kir dawn bawk a ni.