Aizawl April 6, 2023 : Mizoram Cooperative Society Tangrual Pawl chuan Cooperative Society hruaitute office chelh theih hun chhung bithliah awm chungchangah nimin khan Apex Bank Board Meeting Room-ah an thukhawm a, Cooperative Movement hmasawnna daltu ni zawka an ngaih thu leh an rawtna chu Registrar Cooperative Societies (RCS) Mizoram, Aizawl hnenah an thlen tawh tih an sawi.

Mizoram Cooperative Societies Act, 2006, Act No. 53-ah hian Co-operative Society hruaitu – Board of Management Committee ten an office an chelh theih hun chhung (Term of Office) tarlan a ni a, Act No. 53 hnuaia Proviso-ah hian Cooperative Society hruaitute chu a zawna kum 10 (sawm) bak hruaitu nihna chelh thei lo tura tih an niin, kum 5 chhung an chawlh hnuah chauh hruaitu nihna hi an chelh leh phal chauh a ni tih tarlan a ni.

Cooperative Society hruaitute office chelh theih hun chhung bithliah awm hi Mizoram Cooperative Society Tangrual Pawl chuan zirchianga an ngaihtuah hnuah, he Act hi Mizorama Cooperative Movement ti hmasawntu ni lo a, Cooperative Movement hmasawnna daltu ni zawka a ngaih avangin Act No. 53 hnuaia Proviso hi paih nise tih rawtna Registrar Cooperative Societies (RCS) Mizoram, Aizawl hnenah a thlen a ni.

RCS hian Cooperative Society hruaitute office chelh theih hun chhung bithliahna Act No. 53 hnuaia Proviso paih hi Federation ten an duh leh duh loh hriat a nih theih nan kum 2016 khan State Level Federation te chu an General Assembly theuha lo ngaihtuah turin a ti a. RCS hriattirna ang hian Mizoram chhunga State Level Federation te chuan hemi chungchang hi kum 2016 khan an General Assembly theuhah ngaihtuahin, Federation te chuan Act No. 53 hnuaia Proviso paih an duh thu an passed vek a ni. 

Cooperative Society hruaitute office chelh theih hun chhung bithliahna paih a nihna tur hian Mizoram Cooperative Society Tangrual Pawl hruaitute chuan Department lam hotute vawi tam tak an hmuh tawh laiin an duhthusam ang hmalakna an hmuh loh avangin Chief Minister hnenah an thlen thu meeting ah hian sawi chhuah a ni. Chief Minister thurawn ang hian Mizoram chhunga Cooperative Society nung tha pangngai deuh leh State Level Cooperative Federation te chuan Cooperative Society hruaitute office chelh theih hun chhung bithliahna dan an duh loh thu hi an seal chhutna an hming an sign hnan chu Chief Minister hnenah an thehluh tawh bawk a ni.  
Mizoram Cooperative Society Tangrual Pawl chuan Mizoram chhunga Cooperative Society leh Federation te chu an sawrkar thutlukna lo ngaichang a, hruaitu lo inthlang rih lo turin an inngen tih an sawi bawk a ni.