ZALEN November 7, 2023 : Vawiina Mizoram General Election 2023 neiahah khan 24 Champhai South-a Ruantlang Polling Station-ah Rualhnudawla kum 101 mi leh a nupui kum 86 mi ten vote an thlak a, ZALEN-in a hriat theih chinah nupa-a vote thlak thei upa ber anni. Kum 105 mi Biakleti, Ramhlun Vengthar, Aizawl North II chu vote thlak thei upa bera hriat a ni bawk.



District hrang hrangah kum 80+ leh Persons with Disabilities (PwD) te Home Voting (awmhmuna vote thlak) kalpui a nih laiin Champhai South-a Ruantlang khuaa cheng anni nupa hi chuan hetianga vote thlak theih a ni tih hi an lo hre lo a, Mizoram hmun hrang hrangah kum upa dang pawh hemi hre lo hetianga polling booth pan an awm tih ZALEN chuan thu a dawng.

ZALEN-in a hriat chinah Biakleti, Ramhlun Vengthar, Aizawl North II chu tun tum inthlana polling station-a vote thlak kum upa ber a ni a, kum 105 mi a ni.

Mipa vote thlak zinga upa bera ngaih Rualhnudawla leh a nupui Thanghleithluaii te hi kum 62 vel an innei tawh a, fa mipa pakhat leh fanu pathum an nei a ni. Kuthnathawka eizawng an ni thin a, tunah hian an fanu hovin an khawsa mek a ni.

An sawi dan chuan Rualhnudawla hian kum 95 a nih thleng khan Thang a la kam a, a kum 95 kum hian Hlei hmaibial pakhat, Thehlei pathum leh Chepa pakhat a la awk thei a ni. Rualhnudawla hi ruihtheih thil ti ngai lo a ni a, Thingpuisen in ngai lo a ni bawk.