Aizawl: Mizoram atanga tripura a tlanchhia Bru voters mi 207 te chu Mizoram Electoral Roll atangin paih an ni tawh a, midang pawh paih chhunzawm zel tum an ni.

ZALEN-in election department thawktute hnen atanga thu a dawn danin Mizoram Electoral Roll atanga paihte hi Hachhek bial atangin voter 67, Dampa atangin 9, Mamit atangin 70, Tuirial atangin 44, Kolasib bial atangin 7, Serlui bial atangin pariat, Thorang pahnih, an vaiin voter 207 an ni. 

Election department thawktute hnen atanga Zalen thudawn danin Tripura sawrkar chuan Bru pem thla mi 1,090-te chu Tripura E/Roll-ah an thun tawh niin an sawi a, tunah hian Tripura E/Roll a inthun dil voter 1,786 an awm leh mek niin an sawi. Tripura sawrkar hian E/Roll-a an thunte hming hi Mizoram sawrkar a rawn hriattir a, chumi hmang chuan Mizoram sawrkarin roll atangin an hming hi a lo paih thin a ni.

Chief Electoral Officer, Mizoram chhinchhiah danin kum 2018 MLA inthlan dawn khan Tripura-a tlanchhia Bru, Mizoram electoral roll-a hming chuang (vote nei) hi 11,232 an awm a ni.