Aizawl: Second Mizoram Finance Commission chuan Zirtawpni khan an Chairman F. Vanlalruata hoin Aizawl Municipal Corporation zirchianna AMC Office, Thuampui, Aizawlah an nei a, Aizawl Mayor Lalrinenga Sailo leh a thawhpuiten an lo dawngsawng.

AMC Conference Halla Zirchianna hun hman hi Zothanmawia, Municipal Commissioner, AMC-in a kaihruai a, mayor-in keynote address neiin, “AMC-ah hian 12th Schedule of the Indian Constitution-in function transfer tur a tih zinga tam tak transfer a ni tawh chungin hnathawk tak tak tur chuan AMC hi thuam chak a la ngai hle a ni,” a ti.

AMC-a councillor-te thawhhona a that thu sawiin, party pawh sawiloin ward fund pawh  a inzata an insem thin thu a tar lang a. Mizoram Finance Commission ten office-a zirchianna an nei chu a lawm thu sawiin AMC dinhmun hre chunga rawtna tha tak an siam ngei a beisei thu a sawi bawk a ni. 

Chairman, 2nd Mizoram Finance Commission F. Vanlalruata chuan commission chuan Urban Local Bodies, Automonous District Councils leh Rural Local Bodies-te sum dinhmun zirchiangin sawrkar atanga pawisa pek chhuah dan turah rawtna an siam tur thu a sawi a; chu chuan Mizoram tan thil tha a thlen ngei a beisei thu a sawi bawk.

Second Mizoram Finance Commission chuan Zirtawpni khan an Chairman F. Vanlalruata hoin Aizawl Municipal Corporation zirchianna AMC Office, Thuampui, Aizawl-ah an nei a, Aizawl Mayor Lalrinenga Sailo leh a thawhpui ten an lo dawngsawng a ni.        

AMC sum leh pai dinhmun leh hnathawh hrang hrang presentation H. Lalhmingthanga, Joint Municipal Commissioner hnen atangin ngaihthlak a ni a. AMC inrelbawlna leh subject a khawih mek dinhmun tarlangin, Central leh State sawrkar atanga sum an hmuh thin dante leh AMC-in pawisa a thawhchhuahte a tarlang a. AMC chuan a sum dawn te tha taka a hman thin thu leh sum tam zawk chu Aizawl  khawpui hmasawnna atana hman a nih thin dan te kalkhawmte a entir bawk a ni; AMC in assets tha tak tak a siam tawhte leh a siam mek te a hmuhtir bawk. 

Sawihona hun neih chhunzawmin, Councillor-te atangin Aizawl khawpui tana chak zawka hnathawh theihna tur rawtna hrang hrang ngaihthlak a ni a. ULB kenkawh tura Central Sawrkarin scheme a duan te AMC kutah dah a la nih loh thu sawiin, AMC chu kum 10 chuang ding tawhin chak takin a thang mek a, chuvangin project lian zawk thawk thei turin a rintlak tawh a ni, an ti a, hei hi State Sawrkar pawhin hriatpui se an duh thu an sawi bawk. 

Mizoram Finance Commission Chairman hi Lalmalsawma, Member Secretary leh Lalrohlua, Deputy Secretary ten an tawiawm a. Aizawl Mayor hi R. Thanglura Deputy Mayor, Executive Councillor-te, Councillors ten an tawiawm bawk a ni.