Sawrkar laipui chuan hnam hnuaihnung zawkten mi dangte chanvo ang an chan ve theih nan a bika humhalh leh hna hrang hrangah pawh an tana hausak (reserve) neih tul a tih avangin chanvo a siamsak thin a. Sawrkar laipui hmalakna a zarah hnam hnuaihnung leh tlem zawkte pawhin sawrkar hna hrang hrangah dinhmun pawimawh a chelh theih phah thin a ni. Mizorama Gorkhali-te chuan hnam tlem leh an tana sawrkar hna pawh hauhsak ngai nia inhriain Mizoramah OBC (other backward class) neih an duh/tum thin a, sawrkarah pawh tum eng emaw zat dilna thlen tawhin an dilna hi thuneitu sang chuan an zirchiang mek. Mizoram Gorkha-ten OBC an dil chungchang ngaihtuahtu Permanent Body chu tunhnai khan Law Commission Chairman hovin Secretariat Conference Hall-ah an thukhawm a, Gorkha ten OBC an dil chungchang zirchiang tur hian MZU-a Sociology Department te rawih ni se an ti. Mizoram Gorkha Sangh President SB Thapa chuan OBC an dil chu Mizoram sawrkar hna laknaah ni lovin Central hnaah chauh a ni tih Zalen a hrilh a. “OBC min pek loh avang hian kan chanvo tur chu state danga miten an hnawhkhat tho tho a, state danga mi ten an hnawhkhah ai hi kan hnawhkhat ve ang e kan ti mai a ni a. Hetia kut benga min dah reng mai hi mak kan ti hle a ni,” a ti. Gorkha OBC pek hi Central YMA chuan an dodal tlat tih CYMA President Vanlalruata chuan a sawi a. “Gorkhali-te hi en hranna kan nei lo a, Mizoram sawrkar hnalakna hrang hrang MPS, MIS leh a dang dangah te pawh an tling a. Tuna central sawrkar hnuaia hna laknaah chauh OBC an beisei hi nakin lawkah chuan Mizoram sawrkar hnuaia hna laknaah pawh an phut ngei dawn a; chuvangin, lo inven lawk hi a ngai kan ti a ni,” tiin Zalen a hrilh. Mizoram Legislative Assembly September 12, 2018-a neihah MLA Lalruatkima zawhna (unstarred question) a chhannaah Home Minister R.Lalzirliana chuan Mizoramah Gorkha 4453 an awm niin a sawi. OBC-ah hian Gorkha hi dah ni ta se hnalakna reng rengah an tan 27% hauhsak a ni dawn nia thudawn a ni.