ZALEN November 11, 2024 : Vawiin khan Congress thalai chuan November 7, 2024 zana Mi firfiak ten Manipur Jiribam District-a Ngurthansanga Hmar nupui Zosangkimi Hmar, kum 31 mi pawngsuala hal hlum zui chungchangah Manipur Chief Minister N. Biren Singh chu a ranglama hmala tura ngenna leh Zosangkimi pasal Ngurthansanga Hmar leh a fate Franky Lalchawisanga (kum 3), Victoria Laldomawii (kum 9) leh Lalringdiki (kum 7) te hnena zangnadawmna pe ngei tura ngenn lehkha Governor kaltlangin an pe.

MPYCC President Laltawnliana chuan, "Manipur buaina chungchangah Adviser to Chief Minister Lalmuanpuia'n August 3, 2024 (Inrinni) khan Lamka-ah thuthar thehdarhtute a kawm tumin Chief Minister Lalduhoma leh Union Home Minister Amit Shah te inbiakna chanchin a lo hriat thu leh Manipur Chief Minister N. Biren Singh-a'n Manipur buaina chingfel tura palai hna thawk tura Lalduhoma a sawm thu leh Chief Minister Lalduhoma a biak nghal thu a sawi niin ka lo hria a, Mizoram mipui kan lawmin kan thla a muang hle," tih a sawi.

"Zonet chanchinthar-ah erawh Manipur Chief Minister hian remna palai atan Mizoram Chief Minister ruat a nih loh thu leh thu dik lo a nih thu Manipur Assembly House-ah a sawi a. Hemi hnu hian Manipur Chief Minister hian na tak tak leh tawngkam mawi lo tak takin Mizoram Chief Minister a cho thu national media lamah hmuh tur a tam zui hle. Hei hian Mizoram mipui a ti chiai a, heti taka khawvel pum hmuha Mizoram mipuiin an thlan kan Chief Minister a chona hi Congress thalai chuan a ngaizam mai mai dawn lo a, na taka Manipur Chief Minister hi dolet turin Mizoram sawrkar leh mipui ka sawm a ni," a ti.

Laltawnliana chuan, "Mizoram Home Minister zahawm tak Pu K. Sapdanga'n November 2, 2023 (Thawhlehni)-a ZPM Working President a nih laia Aizawl Press Club-ah thuthar thehdarhtute a kawm tuma, 'BJP Meiteiho sapatal vanga kan unaute tawrhna chu Mizoram-ah ZPM sawrkar a din hnu pawha NEDA hoin kan unaute an la sawisa chhunzawm zel a nih chuan, ralkhat atanga kut kuangkuaha thlir ngawt kan tlin ve pek lo ang, a hen tawk tala kan unaute thlavang kan hauh ve pawhin, min dem bik lo turah kan ngai,' tih a sawi pawh Mizoram mipui leh Manipur-a kan unaute hian a tak takin hmuh an duh tawh a ni," a ti bawk.

MPYCC chuan Manipur Chief Minister Biren Singh hnena Lehkha an pek bakah Union Home Minister Amit Shah leh Mizoram Chief Minister Lalduhoma pawh he lehkha pek a ni bawk.