Aizawl: MZP President L.Ramdinliana Renthlei chuan, “Mizoram hi kan thenawm state te angin chimral kan la ni lo a, chhan theih a la ni a, chhan tlak a la awm a. Zoram chhan tur chuan ram hruaitu huaisen leh rintlak kan neih a ngai a, MZP chuan Mizoram leh Assam ramri chinfel a nih thuai theih nan hma a lak chhunzawm zel dawn a ni,” a ti. Nimin chawhnu dar 1:00 khan MZP Conference hall-ah Bairabi Zophai hmuna Assam Police-in Zofate Chawlhbuk sak tum hnatlang te an tih buaina a hliam tuarte leh thil bo MZP-in vehbur a khawn atanga chhawmdawlna semna hun neih a ni a, he huna thu sawitu MZP President chuan, “Kan journalist-ten hliam an tuar a, vuakte an tuar ve kha kan hrethiam lo leh zual a. MZP-in kan hmuh chian em em chu Mizo Journalist-te hi a tul huna chuan an taima a, an huaisen a, an thawkrim a ni tih hi kan hmu chiang hle a ni,” a ti. Bairabi Zophai buaina a hliam tuarte leh thil bo chhawmdawlna Vehbur Mizoram hmun hrang hrang atangin tun dinhmunah a vaiin Rs. 5,44,381 hmuh a ni a, nimin khan mi 32 te hnenah a sum faiin pek chhuah a ni a, a dang hi a bungrua angin pek a ni bawk.