‘Aizawl; Mizoram chanchin thlalak hmanga phochhuahna chu October ni 6, chhun 12:30 atangin neih a ni dawn a, phochhuah turte chu 1860-2000 inkara thlalak te an ni a. Joy JK Pachuau (JNU) leh Willem van Schendel (University of Amsterdam) te’n kum 4 chhung an buapui tawh rah a ni. Hemi rual hian Being Mizo. Identity and Belonging in NE India, Joy JK Pachuau ziah leh The Camera As a Witness: A social history of Mizoram, Joy leh Willem van Schendel te lehkha bu chu Dr. LN Tluanga’n a tlangarh bawk ang. “Mizote hian kan history hi a milem (picture) in kan nei tlem a, kan pi leh pute hmel kan hre mang lo a, he exhibition leh lehkhabu hian kan pi leh pute khawsak dan a kum indawtin a pholang a ni,” Jawaharlal Nehru Universiry, Delhi a zirtirtu leh Mizo zinga Doctorate degree 2 nei awmchhun Joy LK Pachuau chuan Zalen a hrilh. “Thlalak zawngin Mizoram dung leh vang kan zina, British Archives, British Library, Regents Park College, Baptist Mission Society, Pitts Rivers Museum leh National Library of Wales atangin thlalak 20,000 chuang kan la khawm a. Welsh missionary ho khan Mizoram thlalak hlui an lo nei tha vak lo a, Baptist Mission Society te’n an nei tha khawp mai a. Tun exhibition-ah hi chuan 60 kan phochhuak ang” tiin a sawi bawk. Joy Pachuau d/o Rev LB Pachuau lehkha bu hi Oxford leh Cambridge University Press in an chhutsak a, Mizo zingah a vawi khatna nia hriat a ni. Lehkhabu 2 te hi UGC Major Project hmanga buatsaih a ni.