Aizawl: Kum 2015-2016 chhung khan Mizoram chuan Atal Mission for Rejuvenation and Urban Transformation (AMRUT) atan sawrkar laipui atangin vaibelchhe 36.50 a hmu a, sum lokalte hi tui luankawr siam nan a tam ber chu hman tum a ni. Nimin khan UD&PA department hotute chuan Aizawl Press Club ah chanchinbumite kawmin AMRUT chungchang hi an hrilhfiah a, UD&PA Director Zorammuana chuan AMRUT Mission in a tum ber chu khawpui chhunga chengte nitin mamawh phuhruk leh changkan zelna tur atana mamawh buatsaih a ni tih a sawi a. India ram khawpui 500 atangin mihring nuai 1 chenna leh state tin khawpui te chu mission atan thlan an ni a, kum 2019-2020 thleng kalpui tur a ni. AMRUT hnuaiah hian tui intur thianghlim, bawlhhlawh sawngbawlna, tui luankawr tha, kawng tha leh boruak thianghlim siam te chu ngaihpawimawh a ni ang. UD&PA hotute chuan AMRUT sum hmuh dan hi a tirah central leh state ten 50:50 intumsem tura tih a niin hemi hmang hian project siam a ni a, mahse hmarchhak state te tan 90:10 ah thlak leh anih avangin project siamthat leh a ngai a, chuvangin a tak takin hnathawh a la awmlo a, hna tan thuai tum a ni, an ti. UD&PA Director Zorammuana chuan, "Aizawla leimin leh harsatna thleng tam ber hi tui luankawr mumalloh vang a ni a, chuvangin helamah hian hman tam deuh kan tum a ni," a ti. 2015-16 atan AMRUT sum hi central in vbc 36.50 a rawn tum a, Mizoram tum ve vbc.4.056 nen a vaiin 40.556 a ni a, sum hi 20:40:40 a pekchhuah tur niin 1st installment vbc.7.30 chu Mizoram in a dawng tawh. Kum 2016-2017 atan central atangin vbc.42 beisei a ni a, Mizoram in a tum ve tur vbc, 4(10%) nen vbc.46 vel beisei a ni.