Aizawl April 12, 2023 : Vawiin khan MPCC Office Bearers Meeting chu Golden Hall, Congress Bhavan a neih a mi a, he hunah hian resolution an siam a, ZMC atanga MBBS first batch pass te an lawmpui thu leh he Mizoram-in medical college a neih theihna atana hmalatute hre reng turin Mizoram mipui te an ngen. 

MPCC OB meeting chuan, Congress sawrkarin harsatna tam tak paltlanga kum 2018-a Medical College a din, Mizoram Institute of Medical Education and Reasearch (MIMER), MNF sawrkarin Zoram Medical College (ZMC) ti a hming a thlak takin MBBS First Batch result tha tak a nei ta chu lawmawm an ti a. Doctor zirlai 95 zinga pass ta zirlai 68 (71.57%) te leh staff zawng zawngte Congress Party chuan an lawmpui a, hlawhtling ve ta rih lote pawh hlawhtling zui ngei turin duhsakna an hlan a ni.  

Mizoramin Medical College a neih theih nana tha thawhtu zawng zawng, Chief Minister hlui Lal Thanhawla leh Health Minister hlui Lal Thanzara te, sum mamawh engkim ngaihtuahtu, a hunlaia Finance Minister Lalsawta leh hotu dangte, official zawng zawngte Congress Party-in an hriat reng thu leh an thawhrimna zara Medical College neih theih a ni tih hre reng turin Mizoram mipuite an ngen bawk.