ZALEN June 22, 2026: Chief Minister Lalduhoma chuan vawiin khan CM Conference Hall-ah NHIDCL MD, Dr. Krishan chu Mizorama NHIDCL hnathawh te thlirhona (Review) meeting a neihpui a, Mizoram chhunga kawngpui leh Lei pawimawh chungchang te ngaihtuah a ni a, harsatna lian an thlen loh dan tur an sawiho.

Aizawl - Thenzawl Road National Highway-a siam tura DPR siamtu tur zawn mekah tun thla tawpah hawn a ni a. Dr. Krishan Kumar hian, Alignment hi kumina peih fel an tum ang a, nakkumah sanction neih hman an lo tum tur thu a sawi.

Seling - Tipaimukh National Highway-ah Tuirini lei leh Tuivai lei chu a rang lama siam that a tul thu Chief Minister chuan a sawi a. Permanent Bridge siam turin hun a mamawh rih dawn avangin, bridge awmsa chu a ranglama thuam that phawt ni se, an ti. 

NH 6, Vairengte - Sairang kawngpui repair and maintenance chungchangah Khamrang to Sairang siam that hna chu an thawk zo tawh a, Kolasib lam section pawh an thawh zel thu sawi a ni a. Nikum lama harsatna ang kha kuminah chuan a thleng lo tura an ngai.

NH Tlabung - Kawrpuichhuah hi NHIDCL kuta dah tawh chu tihfel thuai ni se an ti.

Four Lane National Highway Vairengte - Sairang/Aizawl hnathawh meka harsatna te, Aizawl - Tlabung NH thawh mek chungchangah harsatnate chu a rang lama chinfel dan tur an sawiho nghal a ni.

Thingfal khuaa Biak In chim leh School sawn ngaite sak thatna tur DC Lunglei-in proposal a thehluh chu Dr. Krishan Kumar hian a lo enchian tur thu Chief Minister hi a hrilh.

National Highway laih tharin a hèl, National Highway hlui lo ni ta hmun thenkhat NHIDCL lamin one time improvement an tih hnua state PWD hnena hlan tur chungchang sawi a ni a, NHIDCL lamin one time improvement a tih tawh te chu state sawrkara hlan an ni dawn a. A la tih loh te chu NHIDCL hian an thawk phawt ang a, state sawrkarah a hlan turin ruhamna siam a ni. NHIDCL in hna an thawh naa harsatna an tawhte sawi a ni bawk.

Meeting-ah hian Chief Minister hi Vanlalhlana, PWD Minister; Lalthansanga, EF&CC Minister; TBC Lalvenchhunga; H. Ginzalal leh Dr. Lorrain Lalpekliana Chinzah, Advisers to CM bakah official pawimawh ten an tawiawm a. DC leh CALA ten online-in an zawm ve bawk.