ZALEN November 19, 2024 : Manipur buaina kal zela tun hnaia Jiribam District-a buaina chhuak thar lehah mi tam takin nunna an chan bakah in leh lo, Biak in thlenga hal a nih chungchangah Mizoram Kohhran Hruaitute Committee (MKHC) chuan thuchhuah siamin buaina a reh theihna turin thuneitute, a bik takin Central sawrkar inrawlh thuai a, hma la vat turin an ngen. Mizoram mipui leh kohhrante Pathian hnena tawngtaina hlan theuh turin an ngen bawk.

MKHC chuan chi leh chi inkara buaina leh Kristian-te thlur bik nia lang chhuak thar leh chu MKHC Emergency Meeting November 18, 2024-a thukhawm chuan pawi a ti a. Pawi sawi lote nunna inlaksak te, in leh lo inhal sak leh inrikrapna thlengte hi MKHC chuan a dem a. He buaina hi a reh theihna turin thuneitute, a bik takin Central sawrkar inrawlh thuai a, hma la vat turin an ngen a ni.

Kohhran hruaitute chuan, "Mizoram-ah ngei pawh hnam hrang hrangte kan awm a. Lungrual tak leh thlamuang taka kan awm ho zel hi MKHC chuan tha a ti a. Chi bing leh hnam bing zawnga invauna leh inrikrapna te thleng lo turin mipuite i fimkhur theuh ang u, tiin Mizoram mipuite a ngen a. Manipur (Imphal leh a chhehvela) Mizo awmte pawh thlamuang taka an awm zel theihna turin thuneituten hma la ngei se tiin kan ngen bawk a ni," an ti.

Buaina hi a lo reh thuai theihna turin Mizoram mipui zawng zawngte leh kohhran zawng zawngte Pathian hnena tawngtaina hlan theuh turin an ngen bawk a ni.