DOWNLOAD OUR APP

Read latest news on your phone
app-store

Mizoram kut hnathawktute Oilpalm nuai 112 lei tawh

May 10, 2015

Mizoram kut hnathawktute Oilpalm nuai 112 lei tawh

Aizawl: Kum 2008 atanga March 2015 inkar chhung khan Mizoram a kuthnathawktute Oilpalm tharchhuah Rs. nuai 275 chuang chu Company 3 ten an lei sak tawh. Kuthnathawktute Oilpalm leisaktute hi company 3- Godrej Agrovet Ltd., Ruchi Soya Industries Ltd. leh 3F Oil Palm Agrotech Ltd. te an ni a, heng company 3 te hian Oilpalm metric ton 5528.2855 lei tawhin sum Rs. 275,27,301 chu Oilpalm chingtute hnenah an pe tawh a ni. April 2014 atanga March 2015 inkar chhung bikah hian Godrej Agrovet Ltd. chuan lei tam berin metric ton 2061.939 an lei a, loneitute hnenah an leina man Rs. 111,16,581.50 an pe tawh a, tunah hian Bukvannei ah Mill neiin an her mek a ni. Ruchi Soya Industries Ltd. hian metric ton 24.9665 leiin loneitute hnenah Rs. 1,32,368 an pe tawh a, a lei tlem ber 3F Oil Palm Agrotech Ltd. chuan metric ton 8.791 leiin Rs. 47,429 an semchhuak tawh bawk. Mizoram sawrkar leh company ten inremna an siam angin Godrej Agrovet Ltd. ten Mamit leh Kolasib district a tharchhuah te an lei ang a, Ruchi Soya Industries Ltd. in Lunglei leh Lawngtlai district changin 3F Oil Palm Agrotech Ltd. in Saiha, Serchhip leh Aizawl district a Oilpalm tharchhuahte an lei dawn a ni. Agriculture Department thawktute chuan Oilpalm chin chu a hlawk hle tih Zalen an hrilh a."Inremna siam anih angin company te hian Oilpalm tharchhuah hi an lei ngei ngei a ngai a, hralh theihloh a awm ve lo a, chubakah direct in loneitute account ah pawisa hi a luh bawk avangin sum bo thlau a awm ve lo a ni," an ti a. Oilpalm hriak ah chuan 'cholesterol free' anih vangin mipui ten an duh bik tih sawiin Ruchi Soya phei chuan an tel (Oil) tharchhuah chu Mizoram ah zawrhchhuah an tum hnai a, Agriculture department nen an indawr mek niin an sawi bawk. Oilpalm hriak hi Edible Oil, cosmetic, bio dieselbakah a hriak lakna hnu hi Vawk chaw leh Sangha chaw ah te an hmang thin a ni.
Share now