Aizawl September 21, 2022 : Thawhtanni kalta a inbiak tum, Assam CM te chhungkaw harsatna avanga thulh a nih hnuah Mizoram leh Assam Chief Minister te Zoramthanga leh Himanta Biswa Sharma te chu vawiin khan Assam House, 1 Bordoloi Marg, New Delhi ah state pahnih inlaichinna chungchangah an sawi dun.

CM te pahnih inkawmna ah hian ramri chungchang thu an sawidun a. Hemi chungchangah hian a tira state pahnih Minister te leh official ten inbiakna te nei se, a tul angin Chief Minister te ve ve pawh inbia se tih chu bawhzuia vawiina inkawm hi an ni a. Minister leh official te'n bul tana inbiakna an neih chu tluang takin kal zel nia an hriat thu an sawi. Ramri chunchang inbiakna awm chu lawmawm a tih thu an sawi a ni.

Kuhva chungchang sawi bawkin, kuhva ro dan lo anga lo lut chu Assam leh Mizoram chuan lo dan vek a, kuhva hring, Mizorama chin erawh engti kawng maha dang lovin, a hralhna tur hmunah tlang zel ni se tiin an sawi. Himanta Biswa Sharma pawhin theihtawpin a tul chuan police te hmangin kuhva hring chu dang lova tlang tir zel a tum thu Zoramthanga chu a hrilh a ni.