Mizoram leh Assam ramri hian chanchinbu-ah sawi a hlawh ta hle. British sawrkar leh Suakpuilala te pawhin sawi an hlawh hle bawk.

UT kan nih atang khan Mizoram sawrkar apiang Assam nena kan ramri ching fel turin kan duhin kan beisei a. Tun thleng hian hma kan la sawn chuang lo va. Mizo mipui pawh an phun ngai rengin an la phun bawk. Kan nula tlangvalten hliam hial an tuar pawhin Mizoram sawrkar chuan an thlavang a hauh lo va, mak an tiin, an thin a ur a, an lakah an beidawng hle.

John F.Manliana khan a nupui neih hlimin he lai ram kan MZP-ten an hauh ramah hian Mizo pathum nen lovah an nei a. Buh an ching a, a tha khawp mai.

John F. Manliana hian a thian pathumte chu police lokal hunah, “Tu thuin nge helai hi lovah in neih?” an tih chuan, “Pu Manliana thu a nei kan ni, ti ang che u,” tiin a chah diam a.

Hun engemaw ti hnuah chuan police chu an lokal ta ngei a. Mahni theuhin thlam an nei far a. John F.Manliana pawhin thlam lian tha tak a nei a. A kawngkhar chu tun hmaa Mizo kawngkhar anga phelsepa siam a ni a. Namtawl theiha siam a ni a.

A thiante khan Pu Manliana thua lo nei an nih an lo hrilh zel a, police Sub-Inspector leh a sipai pangate chuan Pu Manliana thlam chu an pan ta a. A nupui nen chuan thlam chhungah an awm a. A kawngka lu chungah chuan NO ADMISSION tih an tar a.

Police-te chuan a kawngkhar chu an hawng thiam lo va, an nam thla tawp a, an lut ta a. “Manliana i ni em?” police Sub-Inspector chuan a ti a. John F.Manliana chuan, “Ni e,” a ti a. police officer chuan, “Nangma thuin he laiah lo i neihtir a maw?” a ti a. Pu Manliana chuan, “Ka neihtir tih lehkha min pe rawh” a ti a. Pek tur a nei si lo va.

John F.Manliana chuan, “Ka kawngka lu chunga NO ADMISSION intar kha i hmu em?” a ti a. Police officer chuan, “Aw hmu e,” a ti a.

John F.Manliana chuan, “Hmu si eng ati nge ka phalna hmu lo va in lo luh mai? Ka kawngkhar pawh hawng lovin in rawn nam thlu a,” a ti a.

Heta tang hian John F.Manliana chuan vai tawng hmang tawh lovin saptawng a hmang ta a. Police officer chuan, “Saptawngte i thiam ve elo? Khawia i zir nge?” a ti a. John F.Manliana chuan, “Ek ina ka zir a ni,” a ti a. Police Officer chuan, “Ek inahte Saptawng an zir ngai em ni?” a ti a. John F.Manliana chuan, “ A ni reng asin, khawiah nge i zirte min tih mai mai,” a ti a. “Ka phalna lovin ka inah i lo lut a, ka kawngkhar in namchhia, chhuak nghal rawh u,” a ti a. An chhuak ta a. A tukah chuan Hailakandi-ah John F.Manliana chu a zuk kal a. Police officer leh a hote chu Jail-ah a zu khung phiar a. An lokal leh tawh ngai lo.

Assam rama kan ramri hi India leh MNF hruaitute an inbiak lai khan 1875 anga ziak turin Pu Laldenga te khan Prime Minister hnenah an sawi a. Rajiv khan, “Hei hi chu inrem loh phah nan i hmang lo vang. Ramri chungchanga buaina a awm chuan India Danpuiah chinfel dan tur chu a inziak alawm. Inrem phawt a tha,” a ti tlat a. Inremna chu 1875 ramri ring lovin ziah a ni ta a.

Pu Laldenga a lo sawrkar khan Assam Chief Minister Mahanta nen an inkawmnaah an sawi dun a. Assam C.M Mahanta khan, “1875 ramri ang hian ka pe vek ang che. Silchar leh Vairengte inkara leilet neitute hi Bangladesh atanga lo lut vek an ni a. Bengali hlir an ni a. Assam hian Bengali kan ngah lutuk a. In duh leh Bangladesh-ah in umkir vek ang a. In duh leh in umdarh vek ang a. An leilet hi in neihsak vek ang a. Mizoram chu buhfaiah chuan in intodelh mai ang,” a ti a.

Pu Laldenga sawrkar kha a tlak leh tak avangin an thu kha a puitling ta lo va ni. A pawi ngawt mai. Lei leh nan Bulldozer paruk lai a lei phah nghe nghe a ni. Pu Laldenga kha ramri vei lo leh India palaite nen an inbiaknaah te khan engmah sawi lo leh ramri ngaihtuah zui lo anga sawi an awm leh zauh thin a. Rajiv nen pawh khan an sawi thui hle a. Mahse, Rajiv khan inremna tihpuitlin thuai thuai a duh avang leh Home Secretary kha a pension a hun tawh bawk si a. Ani pension hnua Home Secretary thar nena inremna han sawi thar leh chhung a rei dawn avangin inrem thuai thuai a hmanhmawh khan inremna pawh kan duh ang ramri a tel ta lo kha a pawi hle. Mahse, kan thenawmte pawh an duh ang ramri nei lo thiau an ni a, kan sawrkar chu a duai bik lo vang chu.

Home Minister huaisen tak, zam ngai lo kan nei hi tuman i theihnghilh lo vang u. Arakan Product hian a tih dan tur a hai hauh lo vang.

Isaac Zoliana
Ph. : 9436351567