Aizawl November 10, 2024 : Mizoram leh Assam inrina hmun hrang hrangah tunlaiin boruak a muanawm a, harsatna thleng a awm lo. Heng ramri-ah hian Mizoram police-te ngawrh takin an la duty chhunzawm zel.

Mizoram leh Assam inrina, buaina lo chhuah tawh thinna hmun, Thinghlun atanga ZALEN thudawn danin Thinghlunah hian Mizoram police (4th IR) an la duty a, Assam pawhin duty an la indah.

“Boruak a ralmuang a, ramri-ah zalen takin kan inkalpawh thei a, harsatna thleng a awm lo,” tiin thudawnna chuan a sawi.

Bairabi lamah pawh ramri-ah boruak a ralmuang tih Bairabi OC chuan ZALEN a hrilh a, ramri hnaiha Assam-in mandir sak an tumnaah tun thlengin Mizoram police pali zel darkar 24 chhung an la duty chhunzawm a, Assam pawhin duty an la indah chhunzawm zel bawk.

Helai hmun bakah hian Zophai lamah pawh boruak duhawm lo thleng a awm lo.

Heng hmun pahnih bakah hian Mizoram leh Assam inrina Vairengte Aitlang leh Sabual hmunah te Mizoram police-te ngawrh takin an la duty tih thudawnna Vairengte OC chuan ZALEN a hrilh bawk a, Assam lam pawhin duty an la indah a, boruak a ralmuang a, an hriat theih chinah harsatna thleng a awm lo niin Vairengte OC chuan a sawi.

Hmun dangte ang bawkin Mizoram leh Assam inrina pakhat, Saiphai lamah pawh boruak a ralmuang a, harsatna thleng a awm lo niin thudawn a ni bawk.