Aizawl: Zirtawpni kalta khan Aijal Club ah Directorate of Geology & Mineral Resources Department huaihawtin Mizoram a leimin chungchang (Landslides in Mizoram) zirho a ni a, mithiam kalkhawmte chuan leimin chhan ber chu mihring ten ram an tihbua vang leh a leilungin a zirloh vang nia an hriat thu an sawi. Mithiam hrang hrang kalkhawmte chuan Mizoram a lung awmte chu ramdang ngaihtuahin a chhe biklo nia sawiin leimin chhan ber chu mihring ten leilung vawng nghettu thing leh mau an tih chereu nasat vanga rambua vang te, hmasawnna avanga kawng laih te, hmun thenkhata ram leilung (soil) in a zirloh vangte nia an hriat thu an sawi a. Hmasawnna hna hrang kawnglaih, in hmun laih etc. thawh dawnah leilung chanchin hre mi te rawn thin nise tih leh Mizoram sawrkarin leilung enfiahna tur hmanraw tha zawk nei thei se an duh thu kalkhawmte chuan an sawi. Geology & Mineral Resources Department Director Dr. H.Lallenmawia chuan Mizorama chhiatna thleng hrang hrang kangmei, thli, ruah etc. zingah leimin chu chhiatna thlentu lianber a niin 98% lai a hauh phak tih a sawi a. Hna engpawh thawh dawnah ram leilung awmdan zirchian hmasak thin nise a duh tih a sawi. Parliamentary secretary i/c Geology & Mineral Resources Department Joseph Lalhimpuia pawhin mihring siamchawp harsatna a thlen tam tawh avangin hmasawnna hnathawh dawnah mithiamte rawn nachang hriat a pawimawh tih a sawi bawk.