Aizawl: Tripura camp hrang hrang atanga Bru lo let, Mamit district khaw hrang hranga awm mekte chuan Zirtawpni khan Mamit I&PR conference hall ah inhmuhkhawmna neiin tuna Tripura camp hrang hrang 6 a awmte Mizorama hruai let turte hamthatna hmuh tur ang hmuh ve an duh a, hemi a hmala turin Equal Package Demand Committee an din nghal bawk. Bru Coordination Committee huaihawta inhmuhkhawm naah hian kalkhawmte chuan tuna Tripura Bru te Mizorama hruai let turte tana hamthatna (repatriation package thar ber) sawrkarin a siam chu a hmaa Bru chhungkua, Tripura atanga Mizorama lo let tawh zawng zawngte hnenah August 16, 2018 hmaa pe ve vek turin sawrkar an phut a ni. Bru chhungkua mahni duh thua Tripura camp atanga Mizoram lo let (self repatriated) ten tun thlenga sawrkarin a tiam hamthatna a la pek lohte chu a rang lama pe turin sawrkar an phut bawk a ni. Zirtawpnia kalkhawmte hian sawrkara an thil phutte hi an hun tiam chhunga sawrkarin a tihhlawhtlin loh chuan Equal Package Demand Committee huaihawtin lungawilohna lan tir an tum a, a tul dan a zirin repatriation boycott thlenga hmalak an tum a ni. Mamit district chhung khaw hrang hranga awm Bru kalkhawmte chuan Equal Package Demand Committee chairman ah hian Elvis Chorkhy an thlang a ni. RECAP * Sawrkar laipui, Mizoram, Tripura sawrkar leh Mizoram Bru Displaced Peoples Forum te chuan July ni 2,2018 khan Union Home Minister Rajnath Singh hovin Draft Agreement an siam a, August ni 14, 2018 atanga September ni 10, 2018 chhungin Tripura Relief Camp paruk atangin Bru chhungkaw 5407 (mi 32,876) laklet tur an ni a, hengte hi Mizoram a District pathum Lunglei (chhungkaw 384), Kolasib (chhungkaw 824) leh Mamit (chhungkaw 4199) ah hruai kir tur an ni. * Ni 16.7.2018 MBDPF chu inremna atang hian an inhnukdawk. * Draft Agreement siam ang chuan Bru chhunkaw pakhat tana sum pek tur hi Rs. 6,70,000 a ni a, hei bakah hian kum hnih chhung a thlawnin ration pek an ni ang.