Aizawl: Transport department chhinchhiah danin, kum 2015-2016 thleng khan Mizoramah lirthei 1,65,694 awmin, chung zinga 1,00,270 (60.51%) chu two wheeler a ni. Hetihlai hian Transport department-in kum 2 chhunga revenue a hmuh chu cheng nuai 4150.99 a tling. Tun hnaia tlangzarh Statistical Handbook-a tarlan a nih danin, 2015-2016 thleng khan Mizoramah lirthei 1,65,694 a awm a, a zatve aia tam 1,00,270 zet chu two wheeler niin, car 21,065 a awm bawk. Mizoram a lirthei awm tam zualte chu jeep 15,571, motor cab 8,073, Truck & Lorries 5,597, gypsy 4,049, Maxi cab 2,959 te an ni a, heng bakah hian excavator 1,207 a awm bawk. 2015-2016 chhung khan transport department chuan lirthei 14,208 registered thar a nei a, heng zinga 10,087 chu two wheeler niin, car 1,789 registered thar awm bawkin, auto rickshaw 257, maxi cab 163, ambulance 8, truck & carrier 273, excavator 108, geep 1,173 te chu hemi hunchhunga registered tam zual te an ni a, hemi hun chhunga vek a registered lirthei 146 chu sorkar motor niin, a dang 14,062-te chu private motor a ni. Mizoram ah lirthei 1,65,694 zet a awm tawh lai hian transport department in revenue a hmuh pawh a tam tham hle a, 2014-2016 chhung khan cheng nuai 4150.99 (Vbc 41.50) a hmu tling a, 2014-2015 khan cheng nuai 2147.94 hmuin, 2015-2016-ah cheng nuai 2003.03 a hmu tling leh bawk. Mizoramah kum khat chhunga lirthei registered thar hi chawhrualin 12,000 vel a tling tawh nia ngaih a ni a, hemi vang hian tun dinhmunah Mizoramah lirthei 1,80,000 vel a awm tling tawh turah ngaih a ni.