ZALEN February 15, 2026: Mizoram MP pahnih Lok Sabha MP Richard Vanlalhmangaiha leh Rajya Sabha MP K.Vanlalvena te chuan Indian Air Force (IAF)-in Lengpui ram an lei chungchang chu an bawhzui zel tih an sawi.

Chanchinbu mite chuan Mizoram MP pahnihte hi an chenna inah an kawm a. Rajya Sabha MP K.Vanlalvena chuan, “Lengpui ram lei chungchang hi president, prime minister leh union home minister-ah te ka thlen tawh a. Zawhna ka zawt leh mek a, March 9, 2026 thlenga chhanna ka hmuh loh chuan parliament-ah ka sawi chhuak dawn a ni,” a ti.

Lok Sabha MP Richard Vanlalhmangaiha pawhin, “Lengpui ram lei chungchang leh a kaihhnawih hi unstared question-in ka zawt a, min chhan dan azirin hma ka la ang,” a ti bawk.

Mizoram chanchinbu mite hian Zirtawpni khan India president chenna, Rashtrapati Bahvan leh India ram rorelna in sang ber, Parliament House in hnihte an tlawh bawk.