Aizawl; Mizoram Lok Sabha MP thlanna neih zawh takah General vote leh postal ballot te nen a pumpuiah vote 434513 a tla a, hei hi vote nei thei atanga chhutin 62.26% a tling a. MP a thlantlin tak INC candidate CL Ruala leh amah hnaih tu ber UDF candidate Robert Romawia Royte te vote hmuh inthlauhna chu 6154 a ni. Mizoram Lok Sabha MP thlan ah khan general vote (EVM) ah vote 425701 a tla a, Service vote (postal ballot) ah 819 leh Tuikuk vote 7993 a tla bawk a. EVM vote tla ah hian vote thi pakhatmah a awm lova, hetih lai hian Service vote (postal ballot) ah vote thi 355 a awm a, Tripura transit camp a awm mek, Tuikuk camp 6 atangin vote thi 957 a awm bawk. Vote nung zawng zawng EVM 425701, Service vote (postal ballot) 464 leh Tuikuk vote nung 7036 belhkhawm nen a vaiin vote nung 433201 a awm a ni. Tripura transit camp 6 ah hian voters 11243 an awm a, heng zinga 7993 te chuan vote an thlak a ni. Joint Chief Electoral Officer H.Lalengmawia chuan Tuikuk vote thi a tam chhan chu a diklo a form an fill up vang niin a sawi a. Vote thlakna tur paper ah postal ballot serial number ziah tur anih laiin mi tam takin an voters serial number an ziak a, hei hi Election Commission hriattir an nih hnuah hnawl (reject) tura an tih avangin hnawl an ni a ti a. Tuikuk vote thlak hi Mizoram sorkar official ten an buaipui lo a, training pek that tawkloh nia a lan avangin Tripura official lam mawh niin a lang tih a sawi. Tripura camp pakhat Hazacherra a vote tla 697 phei chu a vaia hnawl a ni.