ZALEN Sept. 25, 2024; Kolasib District Land Owner’s Association chuan ram neitu nihna chingfel tura sawrkar phut nan tukin dar 6 atang khan NH 06 NH 306 Silchar leh Aizawl inkar kawngpui an dang.

Kolasib District Land Owner’s Association thuchhuaha an tarlan dan chuan kum 3 chuang hma la thei lova an ram khuahkhirhna chu sut thuai se an duh a. Ram neitu nihna chingfel thuai tura sawrkar phûtin RRF Notification 1965 chu ram hmasawnna daltu a ni tiin thiah ni se, an ti a. Four Lane Project pawh tihlawhtling tura phûtin, he’ng an thil phut hrang hrang te hian ngaih pawimawh a hlawh theih nan Silchar leh Aizawl inkar kawng chu dan ni se, tih an rel a ni.

An thuchhuah tarlan dan chuan tun hma atanga an lo in benbelna thin chu tunhnaia Four Lane kal tur avangin Forest Department chuan CA/NPV Compensation an duh avangin RRF Notification 1965 tlawhchhanin Vairengte leh Sairang inkar chu Roadside Reserve Forest tiin ram an rawn chuh buai thar leh, an ti a. Vairengte leh Sairang inkara cheng mipuite chu he dan avang hian an him lo tih sawiin mahni in, huan lo/ram tia an lo cheibawl chu Forest Dept.-in an chhuhsak niin an sawi a. RRF dinchantir tuma hmalakna awm mek chu tha ti lovin an dodal zel dawn tih an sawi a ni.

Ram neitu intelkhawm chuan kum 2020 atangin Four Lane ram lak tur avangin sawrkarin an ram chu khawih theih lohin an khuahkhirhsak an ti bawk a. Chhungkaw tam takin eizawn nana an hman an huan thlai enkawl zui thei lovin an dikna leh chanvo rahbehsak an ni, an ti a. An dikna leh chanvo nawr chhuak tura Road Block hial a lo ngai ta chu pawi an tih thu sawiin Mizoram mipuite hriatthiamna an ngen tih an sawi bawk.