Aizawl; Bio Metric Enrollment (BME) kalpui mekah Mizoram mihring 1,05,548 te chhin chhiah fel an ni tawh a, la ziahluh loh 7,59,212 awmin hetih lai hian inziaklut duhlo engemaw zat an awm thung. Tunlai hian Mizoram hmun hrang hrangah Bio Metric Enrollment (BME) hi kal pui mek a ni a, kum 2011 chhiarpui ah khan Mizoram ah mihring 10,97, 206 awmin heng zinga 8,64,760 te chu chhinchhiah tura tih an ni a, an zinga 1,05,548 te chhin chhiah hna chu thawh zawh a ni tawhin la chhinchhiah loh 7,59,212 an la awm a ni. Mizoram district 8 zingah Bio Metric Enrollment (BME) hi Serchhip district ah chhin chhiah tam ber a ni tawhin 31.54% tih a ni tawh a, Kolasib district chuan dawtin 31.32% chhinchhiah a ni tawh a. Hetih lai hian Champhai district ah chuan 2.15% chauh chhinchhiah an la ni a, Mamit district ah pawh 3.02% chauh chhinchhiah a la ni. Bio Metric Enrollment (BME), National Population Regis- ter (NPR) tia hriat bawk ah hian 1st phase chu December 2014 hmaa zawh hman tura rua hman a ni a, India rama cheng, kum 5 chin chunglam chu chhin chhiah vek tura tih a ni. Mizoram district 8 hi Company pahnih in an insem a, Aizawl, Kolasib, Mamit, Champhai leh Serchhip chu LYRA Company, Kolkata in chhinchhiah hna an thawk a. Chhimlam district pathum Lunglei, Lawngtlai leh Saiha district chhinchhiah hna hi ISS, Guwahati in an thawk thung a ni. NPR ah hian chi 15- Hming, chhung kaw pa nen inlaichinna, pa hming, nu hming, kawppui hming, nihna (sex), pianni, thla leh kum, kawppui neih leh neih loh, pianna hmun, khua leh tui nihna, tuna chenna, tuna a chenna hmuna a awm rei zawng, awm nghehna khua, eizawnna, zirsan zawng te chhinchhiah a ni. Kum 2011 chhiarpui ah khan India ramah mihring 1,21,05,69,573 an awm a, khawvela mihring tamna ber dawttu ram a niin ram venhimna leh misual hnu chhuina kawnga thil tangkai tur nia hriain sawrkar laipui chuan Bio Metric Enrollment (BME) hi kalpui turin a ti a ni. BME ah hian kut zungtang 10 thlalak (finger print), mit naute pahnih bakah awm chin chunglam thla te lak a ni. Bio Metric Enrollment (BME) kalpui mek ah hian mi tam tak 'Sakawlh chhinchhiahn' nia ngaia inziaklut duhlo mi engemaw zat an awm a, inziaklut duhlo awm tamna ber khua nia hriat Vairengte ah chuan mi 3481 inziaklut lo an awm. Vairengte atanga thudawn danin NPR ti tur hi Vairengte ah hian mi 9071 chhinchhiah a ni a, heng zinga 5590 te chauh an inziaklut a ni. Inziaklut ve duhlo 3481 zinga a tam ber hi sakawlh hlau an ni a, heng mite bawk hi kum 2011 chhiarpui ah pawh khan an lo tel duh tawh lo a ni. Inziaklut duhlo zingah hian Presbyterian leh kohhran dang pawh engemaw zat an awm nia thudawn a ni.