ZALEN November 17, 2024 : Mizoramah nau piang an tlem a. Hetih lai hian thihna thleng (death rate) erawh a sang hret hret niin a lang a, hetiang zela a kal chuan Mizoram tan a la hlauhawm thei niin mi thiamte chuan an sawi.

Economics & Statistics department-in ‘Annual Report of Registration of Births & Deaths Mizoram’ a tihchhuah atanga a lan danin tun hnai kum nga chhung bikah state dangte nena khaikhinin Mizoramah nau piang an thahnem lo hle a. Kum 2019-ah 23,808 (18.5%), 2020-ah 23,320 (17.28%), 2021-ah 24,314 (17.63%), 2022-ah 26,049 (18.49%) leh nikum 2023-ah 27,180 (18.89%) an awm a, nau piang punna hian national average a phak lo a ni.

Sawrkar laipui, Ministry of Health & Family Welfare-in India-a chengte hriselna dinhmun, mihring awm dan leh ei leh in an zirchianna report hnuhnung ber, National Family Health Survey (NFHS) 5 atanga a lan danin India ramah chawhrualin pianna (fertility rate) hi 2.1 a nih laiin Mizoram bikah chuan 1.9 a ni a. Hemi awmzia chu national level-ah hmeichhe 100-in fa 210 an hrin laiin Mizoramah chuan hmeichhe 100-in nau 190 an hring tihna a ni a, hmeichhe tam takah phei chuan piang zat hi a inthlau dawn hle tihna a ni.

Mizoramah nau piang a tlahniam deuh deuh niin NFHS atang hian a lang bawk a, nau piang hi NFHS 2 leh 3-ah 2.9 a nih ve ve laiin NFHS 4-ah 2.3 leh NFHS 5-ah 1.9 a ni.

Mizoramah nau piang an tlem zel chuan a hlauhawm thei niin mi thiamte chuan an sawi a. Hmeichhe pakhatin chawhrualin nau 2.1 hring thei zel se kan inluah khat (replace) tawk vel niin an ngai a. Nau piang an tlem chhan hi zirchianna tak tak la awm chiah lo mah se chhan hrang hrang zingah tun hma lama kumtlinglo leh naupang tetea inneih ang kha a awm tawh loh avang te, eizawnna leh chhungkaw chawmna hautak vanga kawppui nei duh lo te, chhungkaw rual chu inluah atan an duh loh thin vang te, family planning zawm that lutuk vang, zirna avanga nupui/pasal neih har vang leh kawppui nei peih lo hrim hrim an pun chhoh vangte nia ngaih a ni.

Mizorama nau piang an tlem zel lai hian thihna thleng (death rate) erawh a sang zawngin a kal thung a. Death rate hi kum 2019-ah 5.01, 2020-ah 4.97, 2021-ah 5.87, 2022-ah 18.49 leh 2023-ah 18.89 te a ni.