Aizawl: November 28, 2018-a Mizoram MLA inthlanpui lo awm turah chuh tumin mi 212 in hming an pe lut a, inthlanna a chuh tum te hming hi naktuk, Thawhtanniah endik a ni ang a, inhnukdawk leh duhte tan Nilaini thleng hun hawn a ni.   Mizoram inthlanpui lo awm turah hian Hachhek leh Dampa Assembly Constituency chu candidate tamna ber niin chuh tumin mi 8-in hming an pe lut ve ve a, Aizawl West III, South II, South Tuipui, Lunglei West, Lunglei North, Lunglei South, Lunglei East, West Tuipui, Tuichang, Saiha leh Palak te chu candidate tlemna ber bial an niin heng bialah te hian candidate 4 theuh an awm a ni.   MLA chuh tura hming pe lut zingah hian bial hnih chuh tum mi 7 an awm a, chungte chu INC candidate Lal Thanhawla Champhai South leh Serchhip, ZPM Chief Ministerial candidate Lalduhoma Aizawl West I leh Serchhip, NPP Mizoram Convener Lianzuala Dampa leh Mamit, NCP Mizoram President Lalawmpuia Chhangte Mamit leh Dampa, Zoramthar President Rev. Dr. Zaichhawna Hlawndo in Aizawl West I leh Serchhip bial chuh a tum a, a fanu pahnih Lalhrilzeli Hlawndo-in Aizawl North II leh Lengteng bial bakah Lalruatfeli Hlawndo-in Aizawl North I leh Tuikum bialte an chuh dawn a ni.   Tun tum election ah hian Zoram thar pawl Rev. Dr. Zaichhawna Hlawndo te chhungkua chu candidate thawhchhuak hnem ber an ni a, candidate 3 awmin amah bakah a fate pahnih Lalruatfeli Hlawndo leh Lalhrilzeli Hlawndo te an ding dawn a. Unau a MLA candidate pahnih, INC candidate ve ve Lal Thanhawla leh Lal Thanzara te bakah Zodintluanga leh Chalrosanga te an awm bawk. MLA inthlan lo awm turah hian Indian National Congress leh Mizo National Front chuan bial zawng zawng an chuh kim vek a, party dang chuh kim an awm lo.   District hrang hranga candidate awm dan chu Aizawlah 75 awmin an tam ber a, Lungleiah 29, Champhaiah 26, Mamitah 23, Serchhipah 19, Kolasib ah 18, Lawngtlai ah 14 leh Saiha district ah 8 an awm a ni. Thudawn danin kum 2013 inthlanpuiah khan candidate 142 an awm a ni.