ZALEN; Home minister K. Sapdangan police te a hun lova boral an tam tih sawiin, kumin 2024 Jan. 1 - Aug. 3 chhungin, police 77 an boral thu leh a tam zawk chu kum 50 hnuai lam an nih thu a sawi.

Tukin dar 7 khan Mizoram police fitness parade neih a ni a, a hmanna pui ber Armed Venga neihah home minister chuan, tukina an hun hman chu Mizoram police tan hmasawn tura intuai tharna mellung chhinchhiah reng tur a nih ngei a beisei tih a sawi.

"Mizoramin UT kan neih atanga hun rei tak chhung khan, Mizoram Police-te hi India ram police zingah rinkai langsar kan ni phak thin. Tunah hian mipuiten police-te min thlamuanpui dan a tlahniam ta deuhin a ngaih theih a. Mipuite rinngam ni leh turin, a bultanna atan fitness parade hi ram pumah a ruala neih ni se tiin kan senior officer-ten an rel 

a, tukinah bul kan lo tan thei ta a ni," a ti.

Home minister tarlan danin, police-te a hun lova boral an tam hle a. Kumin 2024 Jan. 1 – Aug 3 chhung hian, police 77 boral an awm tawh. A tam zawk hi kum 50 hnuai lam an ni.

Home minister chuan, "Kan insun chhan 

tam tak chu ruihhlo leh a kaihhnawih natna vang a ni. Police kan ni a, dan kengkawh tur, mipuite venghim tur kan ni. India ram state thenkhatah chuan, ruihhlo laka insum thei lo chu police hna thawk tlak lovah an ngai a, an inchawlh tir mek a ni. Police rintlak nei turin khauh zawka kan kal vete pawh a ngai ta niin a lang. Chu chu ram tan leh mimal tan pawh a tha," tiin a sawi.

Police department-in sanction post an neih zat chu 12,228 a ni tih home minister chuan sawi bawkin, tuna an dinhmun chu post luah 7,781, post ruak 4,447 a nih thu a sawi.

"Tun atang chuan tumahin Puchuam neih awih a ni tawh lo ang. Sipaia min latu chu tu pawh ni se, sipai kan zawm tawh hnu chuan, min thuntute vauchhera hman a thiang tawh lo. Sipaiah chuan kan pute chu kan chunga mite hi an ni mai. Pawn lamah pu nei tlata inhriate chu sipaia tang reng tlak an ni lo. Lal dan indawt kan ngai pawimawh hle ang. Zualko ching thlavang kan hauh dawn lo. Chutih laiin Recruitment-ah te, promotional process-ah te, transfer and posting-ah te dan bawhchhiatna emaw, induhsakna uchuak emaw a awm a nih chuan eng level-ah pawh kan ngaizam lo ang. Police kan ni miau a, dan pela inngaihzam 

hi a rem ve lo a ni," home minister chuan a ti bawk.