ZALEN December 19, 2025: Chief Minister Lalduhoma kaihhruaiin vawiin khan Mizoram State Level Police Conference on Debriefing of DGs/IGPs Conference chu DGP Conference Hall, PHQ, Khatla-ah neih a ni a. Home Minister K. Sapdanga pawhin a telpui.

Chief Minister chuan, "National Level DGP/IGP Conference neih zawh takah khan India rama police te hmasawnna tur rawtna chi hrang hrang 107 siam a ni a. Vanneihthlak takin khang rawtna zingah khan Mizoramin a taka kan lo kalpui tawhte an awm a. Rawtna dangte pawh a theih anga tihhlawhtlin kan tum ang, sawrkar laipui tanpuina pawh kan mamawh viau dawn a ni," a ti.

Kum hnih chhunga Mizoram Police hmalaknate fakin, an thawhrimna zarah ruihhlo a tawmim hle a. Tihrem vek chu harsa rih mahse a supply lam a tlahniam nasa a ni. Kuhva ro tawlhruk dona lamah police ten an thawh that avangin Mizoram chanchina kan Kuhva tharchhuahte hralh that ber kum a thleng mek a ni, tiin police leh an thawhpuite hnenah lawmthu a sawi a.

Lalduhoma chuan, "Police Modernisation Scheme atan tun hnaiah Rs. 3.18 crore kan hmu a, a belhna (additional) fund hi Rs. 21.276 crore min pawmsak leh tawh a. Police mamawh tam tak kan lei ang a, bullet proof car pawh pathum lei kan tum a ni. He fund kan hmuh theih nan hian DGP Pu Sharad Agarwal a thawkrim hle a, a chungah kan lawm hle a ni, a ti a. Mizoram sawrkarin police te hmasawnna tur ruahmanna a neih tlangpui a tarlang a. Chung zinga a langsar chu India dan thar BNSS Act 2023 in a phut anga Directorate of Prosecution dinna tur Notification, tun hnaia tihchhuah tak kha a ni," a ti bawk.

Chief Minister hian, National Police Conference rawtnate zingah kan umzui ran ngai a awm thei a. Kan sum leh pai dinhmun a zira kan bawhzui theih nan ngaihpawimawh hmasak tur thliar ni se a tha ang, a ti bawk.

Home Minister K. Sapdanga pawhin thusawiin, police hna chu misual hrem tuma beihna a ni ringawt lova, vantlang nun him leh ralmuang siamna a ni zawk a. Tun hma atanga dan bawhchhiatna pangaite vil reng chunga dan bawhchhiatna tharlam leh tunlai ber ber hmachhawn thei a kan inbuatsaih a ngai bawk, a ti a. Police te hnathawh tha tak takte avangin lawmthu a sawi a ni.

Meeting-ah hian Vanlalmawia, Home Secretary bakah Mizorama venhimna lam thawktu central leh state agency zawng zawng thuneitute an tel a, district tina Superintendent of Police ten online-in an zawm bawk a ni.

He conference hi kumin November thlaa Raipur, Chhattisgarh-a Prime Minister Narendra Modi kaihhruaia 60th National Level DGP/IGP Conference neih zawh tak bawhzuina a ni.