Mizoram Snooker & Billiards Association (MSBA) buatsaih Mizoram State 9 Ball & 10 Ball Pool Championship 2024-ah inelna chi hniha final lut, T.Laltlansanga chuan nomawi pahnih a la thei ta lo va, 10 Ball Pool-ah champion-in 9 Ball Pool final-ah Lalsangzela a hneh zo ta lo thung.

March 18 atanga MSBA Hall, Hawla Indoor Stadium, Republic Vengthanga inelna kalpui tanah hi Inrinni tlai khan zawh fel a ni a. Chanmari, Lunglei tlangval, Tlana hian 9 Ball Pool leh 10 Ball Pool-ah final a lut ve ve a, 10 Ball Pool final-ah hian MSBA General Secretary T.Laltanpuia, Upper Republic nen inhmachhawnin 8-5-a hnehna changin a champion.

9 Ball Pool final-ah Khatla South tlangval, Sangzela nen an inhmachhawn zui leh a. Hetah erawh hi chuan 8-5-in a tlawm zawkah a tang ta thung a, Sangzela’n nomawi a hum haw thung.

Champion leh finalist-te hian lawmman atan trophy, citation leh pawisa fai an dawng.

Championship-ah hian Mizoram hmun hrang hrang atangin player 80 chuang an inlan a. Mizoram State Sports Council (MSSC)-in an sponsor niin quarter final atangin Explore Mizoram Youtube channel-ah live-a pekchhuah thin a ni.

Final leh a kharna hunah hi Lalbiakzuala, Principal, Govt Aizawl College chuan khuallian niin a hmanpui.