ZALEN January 25, 2026: December 19, 2025 atanga chin hriat loha bo, Salvation Army officer nupa, Maj. Lalthanmawia leh a nupui, Maj. Rualthanpuii te chanchin chu he thu buatsaih lai thleng hian hriat a la ni lo.

ZALEN thudawn danin Maj. Lalthanmawia te nupa hi Letpanchhawng khua, Myanmar-a awm niin December 18, 2025 khan Tahan an pan a, Tahan atang hian December 19, 2025 khan Mizorama krismas hmang turin an nupain bike (Kenbo) hmangin Tiau an pan leh a. Hei hi an hmuh hnuhnun ber niin hemi ni atang hian an chanchin hi hriat zui a ni ta lo a ni.

Mizoram Police chuan Maj. Lalthanmawia te nupa chanchin hi ngaihvenin Myanmar sipai sawrkar pawh an bepawp tawh a, sipai lam hian hetiang civil mi man an nei lo niin an sawi a. Mipui lam sipai - PDF, CNA leh a dangte pawh bepawpin anni pawhin an chanchin an hriat loh thu an sawi.

Rin dan pakhatah chuan Maj. Lalthanmawia te nupa hi kawng lakah chesualin an thi em ni tih ngaihdan pawh a awm a ni.

Maj. Lalthanmawia leh Maj. Rualthanpuii te nupa hi Salvation Army Singapore, Malaysia, Myanmar & Thailand Territory hnuaia thawk mek an ni.