ZALEN August 4, 2026 : National Students’ Union of India (NSUI) Mizoram State chuan vawiin khan School Education leh H&TE Minister Vanlalthlana an hmu a, Mizoram sawrkar hnuaia casual teacher te hlawh ti sang tur leh zirtirtu hlawh inang tlanga siam turin an ngen.

NSUI chuan Mizoram sawrkar hnuaia thawk mek High School leh Middle School-a thawk Casual Teacher Graduate chin, mi 701-te hian ni khatah Rs. 730/- an hlawh mek a, Primary School a thawk Casual Teacher 675-te hian ni khatah Rs. 570/- an hlawh an ti. Mistiri hlawh Rs. 1000/- leh a chunglam leh labour hlawh zat Rs. 600/- pawh an hlawh pha lo hi a tha lo an tih thu minister-ah hian an thlen.

Thalaite, a bikin lehkhathiam zawkte rah behna leh hmusitna, zirtirtu hna zahawmna tihbawrhbannaahah an ngai thu an sawi a. Chuvangin, a rang thei ang bera School Education hnuaia a nghet lo a thawk, Casual Teacher-te hlawh hi tih pun an duh a ni. 

NSUI chuan Sawrkar School a zirtirtute chi hrang hrang, hlawh inang lo nuai awm reng mai chu fel lo an ti a. Mission/Programme hrang hrang (Samagra, Provisional, Casual teacher, etc) hnuaia thawk pawh ni se, Mizoramah chuan zirtirtu hlawh hi inang tlanga siam dan kawng zawn nise an duh hle a. Hma laksak turin Education Minister hi an ngen a ni. 

Zirna siamthatna tur thilah chuan sawrkar thawhpui an inpeih reng a. Chutih rualin, zirna leh zirlaite tana tha lo thil reng reng chu dodal an inpeih reng tih an hrilh bawk.