ZALEN August 28, 2026: Comptroller and Auditor General of India Report 2023-2024 chu August 27, 2026 khan Mizoram Legislative Assembly-ah tlangzarh a ni a, he report-in a tarlan danin Mizoram sawrkar hnuaia Economic sector bik department 16 te chuan March 31, 2024-a financial year a zawh khan 22.54% an hmang bang a, Crore 989.46 an hum.

2023-2024 sawrkar kumah khan heng department 16 te tana budget dah zat hi Crore 4,390.28 a ni a, heng zinga Crore 3,400.82 an hmang. Department ho zinga sum chang hnem ber chu PWD niin Crore 1,338.20 an chang a, Crore 1,109.98 hmangin 82.95% an hmang. P&E chuan dawtin Crore 910.52 an dawng a, Crore 841.38 an hmanga a, 92.41% an hmang. 

Sum dawn atangin a percentage ang chuan I&CT chu hmang hnem ber an ni a, an sum dawn Crore 5.35 atanin Crore crore 5.34 an hmang a, 99.81% an hmang. Fisheries chuan an sum dawn atanga 98.08% an hmang a, anni hian Crore 26.52 an dawng a, Crore 26.01 an hmang. Land Resource, Soil and Water Conservation chuan an sum dawn Crore 27.89 atangin Crore 26.38 an hmang a, an sum hman hi 94.59% a tling.

Irrigation and Water Resources chu an sum dawn atanga percentage-a hmang tlem ber niin Crore 99.85 an dawn atangin Crore 25.20 an hmang a, an hman zat hi 25.24% a ni. Rural Development chuan an sum dawn atangin 59.50% an hmang a, an sum dawn Crore 587.60 atangin Crore 349.65 an hmang. Planning and Programme Implementation chuan an sum dawn Crore 400.40 atangin Crore 248.46 an hmanga a, 62.05% an hmang.

Horticulture chuan an sum dawn atangin 69.93% an hmang a, Agriculture - 72%, Animal Husbandary and Veterinary - 85.40%, Co-Operation - 85.76%, Commerce & Industries - 91.72%, Sericulture - 92.59%, Tourism - 90.20% leh Food, Civil Supplies & Consumer Affairs - 77.31% te an hmang a ni.