Aizawl July 4, 2024: Mizoram sawrkar-in December 28, 2023-a CBI te hnena General Consent a lo pek tawh chu Criminal Law thar siam a nih tak avangin June 27, 2024 khan General Concent Letter thar a pe leh a, dan thar hman a nih dawn avanga Concent Letter a pek thar leh hi a hma a mi nen a dang lam chuang lo niin Vigilance thuchhuah chuan a tarlang.

Vigilance Department chuan July 1, 2024 khan India ram puma hman turin Criminal Law thar - Bharatiya Nyaya Sanhita, 2023 chu a chhuah tak avangin, Department of Personnel & Training, Ministry of Personnel, Public Grievances & Pensions chuan CBI-in a chhui theih tur offence te chu a tharin a rawn chhuah leh a, hetianga dan thar hnuaia CBl-in offence-a chhui theih tur a thara an rawn chhuah leh tak avang hian State sawrkar- in a hmaa CBI hnena General Consent a lo pek kha pek thar leh a lo ngai ta tih Director, CBI-in State sawrkar a rawn hriattir an ti.

General Consent State sorkarin a pek dan tur pawn ruahman sa a rawn dah tel an ti a. Director, CBI- in State sawrkar-in CBI hnena General Consent a pek dan tur a ruahmanna a rawn siam angin June 27, 2024 khan Mizoram sawrkar chuan CBI hnenah General Consent a pe thar leh a, Official Gazette-ah July 1, 2024 khan chhuah nghal a ni, an ti.

Mizoram sawrkar-in CBI hnena General Consent a pek leh a ngaihna chhan chu dan thar hman a ngaih vang a ni, an ti a. Mizoram sawrkarin General Consent a lo pek leh tuna a pek thar leh hi thil thuhmun reng a ni a, sawrkar chu a dinna ngaiah a la ding reng a ni, an ti.